खालापूर | प्रतिनिधी
राष्ट्रीय आरोग्य अभियानांतर्गत राबविण्यात येणाऱ्या ‘क्षयरोग मुक्त भारत – १०० दिवस मोहिमे’ अंतर्गत देवा ग्रुप फाउंडेशन भारत, अष्टविनायक हॉस्पिटल (मोहपाडा, रसायनी), जिल्हा क्षयरोग केंद्र रायगड आणि जिल्हा आरोग्य विभाग यांच्या संयुक्त विद्यमाने ६ जुलै २०२६ रोजी मोहपाडा उपकेंद्र येथे भव्य मोफत आरोग्य तपासणी शिबिराचे आयोजन करण्यात आले. या शिबिराला नागरिकांचा उत्स्फूर्त प्रतिसाद लाभला असून एकूण ५८ नागरिकांनी विविध आरोग्य तपासण्यांचा लाभ घेतला.
शिबिरात रक्तदाब (BP), रक्तातील साखरेची तपासणी (RBS), ईसीजी (ECG), डॉक्टरांचा सल्ला, क्षयरोगाविषयी जनजागृती तसेच विविध आजारांबाबत मार्गदर्शन करण्यात आले. तपासणीदरम्यान अधिक उपचारांची आवश्यकता असलेल्या तीन रुग्णांना अष्टविनायक हॉस्पिटल, मोहपाडा (रसायनी) येथे पुढील उपचारासाठी संदर्भित करण्यात आले.
शिबिराच्या यशस्वी आयोजनासाठी डॉ. अनिकेत मेस्त्री (MJPJAY विभाग, MOD – Manager on Duty) यांनी विशेष परिश्रम घेतले. त्यांच्यासमवेत डॉ. ऋतुजा मोठे, स्टाफ नर्स भावना राहुल, स्नेहल कांबळे, करण पाटील तसेच सहाय्यक अशोक उगलमुगले यांनी रुग्ण तपासणी व व्यवस्थापनात मोलाचे योगदान दिले.
तसेच मोहपाडा उपकेंद्राचे वैद्यकीय अधिकारी, परिचारिका प्रियांका पाटील, एमपीडब्ल्यू दादासाहेब जगताप तसेच आशा सेविका अपूर्वा जोडे, मंगल वाघमारे आणि सीमा खरीवले यांनीही शिबिराच्या यशस्वी आयोजनासाठी उल्लेखनीय सहकार्य केले.
आरोग्य सेवा सर्वसामान्यांपर्यंत पोहोचविणे, क्षयरोगाविषयी जनजागृती करणे आणि आजारांचे वेळेत निदान करणे हा या उपक्रमाचा मुख्य उद्देश होता. उपस्थित नागरिकांनी आयोजकांच्या या समाजोपयोगी उपक्रमाचे कौतुक करत भविष्यातही अशा मोफत आरोग्य शिबिरांचे आयोजन नियमितपणे करण्याची अपेक्षा व्यक्त केली.
