दोडामार्ग | प्रतिनिधी
दोडामार्ग पोलिसांनी अवैध गोवा बनावटीच्या दारूविक्रीविरोधात विशेष मोहीम राबवत दोन ठिकाणी धडक कारवाई केली. या कारवाईत एकूण ११ हजार ७३० रुपयांची गोवा बनावटीची दारू जप्त करण्यात आली असून दोघांविरुद्ध महाराष्ट्र दारूबंदी कायद्यान्वये गुन्हे दाखल करण्यात आले आहेत.
पहिल्या कारवाईत कुडासे तिठा (ता. दोडामार्ग) येथे प्रवीण लक्ष्मण धरणे (वय ४१, रा. गावठाणवाडी, साटेली भेडशी) याच्याकडून ५ हजार १०० रुपयांची गोवा बनावटीची दारू जप्त करण्यात आली. या प्रकरणी महिला पोलीस कॉन्स्टेबल उर्मिला रमेश सातार्डेकर यांनी फिर्याद दिली असून पुढील तपास पोलीस हेड कॉन्स्टेबल वसंत देसाई करीत आहेत.
दुसऱ्या कारवाईत साटेली परमे रोड येथील एका घरामागील आडोशातून शुभम देवेंद्र धरणे (वय २५, रा. खैराटवाडी, साटेली भेडशी) याच्याकडून ६ हजार ६३० रुपयांची गोवा बनावटीची दारू जप्त करण्यात आली. या प्रकरणी पोलीस कॉन्स्टेबल विजय सुरेश जाधव यांनी फिर्याद दाखल केली असून पुढील तपास पोलीस हेड कॉन्स्टेबल अंकुश नाईक करीत आहेत.
ही कारवाई पोलीस निरीक्षक हेमचंद्र खोपडे यांच्या मार्गदर्शनाखाली करण्यात आली. कारवाईत पोलीस हेड कॉन्स्टेबल वसंत देसाई, विठोबा सावंत, अंकुश नाईक, उमेश देसाई, महिला पोलीस कॉन्स्टेबल उर्मिला सातार्डेकर, पोलीस कॉन्स्टेबल विजय जाधव तसेच चालक पोलीस हवालदार अनिल कांबळे यांनी सहभाग घेतला.
दोडामार्ग तालुक्यात अवैध दारूविक्रीविरोधातील विशेष मोहीम पुढेही सुरू राहणार असून अशा बेकायदेशीर व्यवसायाविरोधात कठोर कारवाई करण्यात येईल, असा इशारा पोलिसांकडून देण्यात आला आहे.
