माढा | प्रतिनिधी
माढा तालुक्यातील भूमी अभिलेख कार्यालयाच्या कथित गलथान कारभाराविरोधात संतप्त शेतकऱ्यांनी छत्रपती शिवाजी महाराज चौकात रास्ता रोको आंदोलन करत तीव्र निषेध व्यक्त केला. विविध गावांतील शेतकरी मोठ्या संख्येने आंदोलनात सहभागी झाले होते.
माढा, उपळाई, उंदरगाव, जाधववाडी, वेताळवाडी, शिंदेवाडी, चिंचगाव आदी गावांतील शेतकऱ्यांनी भूमी अभिलेख कार्यालयातील कामकाजाविषयी नाराजी व्यक्त केली. कार्यालयातील कर्मचारी वेळेवर उपस्थित राहत नसल्याने तसेच आवश्यक कागदपत्रे मिळविण्यासाठी वारंवार हेलपाटे मारावे लागत असल्याचा आरोप आंदोलनकर्त्यांनी केला.
शेतकऱ्यांचे म्हणणे आहे की, महसुली कामे वेळेत होत नसल्याने शेतीसंबंधित विविध व्यवहार आणि शासकीय योजनांचा लाभ घेण्यात अडचणी निर्माण होत आहेत. त्यामुळे भूमी अभिलेख कार्यालयातील कामकाजात सुधारणा करून नागरिकांना वेळेत सेवा उपलब्ध करून द्यावी, अशी मागणी करण्यात आली.
यावेळी शंभूराजे साठे, आबासाहेब साठे, किरण पवार यांच्यासह अनेक शेतकऱ्यांनी संबंधित अधिकाऱ्यांना जाब विचारत प्रशासनाने तातडीने सुधारणा करावी, अन्यथा आंदोलन अधिक तीव्र करण्याचा इशारा दिला.
