अंबाजोगाई | प्रतिनिधी
अंबाजोगाईसाठी महत्त्वपूर्ण निर्णय घेत महाराष्ट्र शासनाच्या वैद्यकीय शिक्षण विभागाने स्वामी रामानंद तीर्थ ग्रामीण शासकीय वैद्यकीय महाविद्यालय (स्वाराती) संलग्न जीएनएम पदविका परिचर्या विद्यालयाचे श्रेणीवर्धन करून १०० विद्यार्थी प्रवेशक्षमतेचे शासकीय बीएस्सी नर्सिंग महाविद्यालय सुरू करण्यास मंजुरी दिली आहे. यासंदर्भातील शासन निर्णय ८ जुलै २०२६ रोजी जारी करण्यात आला.
केज विधानसभा मतदारसंघाच्या आमदार नमिता मुंदडा यांनी अंबाजोगाई व बीड जिल्ह्यातील विद्यार्थ्यांना स्थानिक पातळीवर नर्सिंगचे उच्च शिक्षण उपलब्ध व्हावे यासाठी शासनाकडे सातत्याने पाठपुरावा केला होता. त्यांच्या प्रयत्नांना या निर्णयामुळे यश मिळाल्याचे मानले जात आहे.
देशात प्रशिक्षित नर्सेसची वाढती गरज लक्षात घेऊन २१ जून २०२६ रोजी झालेल्या मंत्रिमंडळ बैठकीत या प्रस्तावास मंजुरी देण्यात आली होती. ‘अपग्रेडेशन ऑफ स्कूल्स ऑफ नर्सिंग टू कॉलेज ऑफ नर्सिंग’ या केंद्र शासनाच्या योजनेअंतर्गत या प्रकल्पासाठी ७ कोटी रुपयांचा १०० टक्के केंद्रीय निधी उपलब्ध होणार असून, उर्वरित खर्च राज्य शासन उचलणार आहे. महाविद्यालयासाठी आवश्यक इमारत उपलब्ध असल्याने शैक्षणिक प्रक्रिया लवकर सुरू होण्याची अपेक्षा व्यक्त केली जात आहे.
या निर्णयामुळे बीड जिल्ह्यासह अंबाजोगाई परिसरातील विद्यार्थ्यांना नर्सिंग क्षेत्रातील पदवी शिक्षणासाठी इतर शहरांमध्ये जावे लागणार नाही. तसेच वैद्यकीय क्षेत्रात करिअर करू इच्छिणाऱ्या युवक-युवतींसाठी रोजगाराच्या नव्या संधी उपलब्ध होण्यास मदत होणार असून ग्रामीण आरोग्य व्यवस्थेलाही बळ मिळणार आहे.
या निर्णयाबद्दल आमदार नमिता मुंदडा यांनी मुख्यमंत्री देवेंद्र फडणवीस, उपमुख्यमंत्री अजित पवार, उपमुख्यमंत्री एकनाथ शिंदे, वैद्यकीय शिक्षणमंत्री हसन मुश्रीफ, मंत्री पंकजा मुंडे आणि राज्यमंत्री माधुरी मिसाळ यांचे आभार व्यक्त केले. दरम्यान, या महत्त्वपूर्ण निर्णयाचे विविध स्तरांतून स्वागत करण्यात येत आहे.
