जळगाव | प्रतिनिधी :
राज्य शासनाच्या शिक्षकविरोधी धोरणांविरोधात आज (दि. ९ जुलै) महाराष्ट्रभर शिक्षकांनी राज्यव्यापी सामूहिक रजा आंदोलन पुकारले असून, जळगाव जिल्ह्यातही या आंदोलनाला उत्स्फूर्त प्रतिसाद मिळत आहे. विविध शिक्षक संघटनांनी एकत्र येत आंदोलनाला सक्रिय पाठिंबा दिल्याने जिल्ह्यातील अनेक शाळांमधील शिक्षक सामूहिक रजेवर गेले असून, अनेक शाळांचे शैक्षणिक कामकाज प्रभावित झाले आहे.
मतदार यादीच्या विशेष संघन पुनरावलोकन (SIR) मोहिमेसाठी शिक्षकांवर सोपविण्यात आलेल्या BLO व इतर अशैक्षणिक कामांतून शिक्षकांना पूर्णपणे मुक्त करावे, ही आंदोलनाची प्रमुख मागणी आहे. याशिवाय शिक्षकांच्या विविध प्रलंबित सेवा विषयक प्रश्नांवर शासनाने तातडीने निर्णय घ्यावा, अशीही मागणी करण्यात येत आहे.
आज सकाळी १०.३० वाजता जळगाव जिल्हाधिकारी कार्यालयासमोर जिल्हाभरातील शिक्षक मोठ्या संख्येने एकत्र येऊन शासनाच्या नावाने निवेदन सादर करणार आहेत. या आंदोलनात प्राथमिक, माध्यमिक व उच्च माध्यमिक शिक्षक संघटनांचे पदाधिकारी तसेच शिक्षक मोठ्या संख्येने सहभागी होणार असल्याची माहिती संघटनांनी दिली.
आंदोलनातील प्रमुख मागण्यांमध्ये शिक्षकांना BLO व इतर सर्व अशैक्षणिक कामांतून मुक्त करणे, सन २०१३ पूर्वी नियुक्त शिक्षकांना TET परीक्षेतून सूट देणे, पदोन्नतीमध्ये अनुभव व ज्येष्ठतेला प्राधान्य देणे, न्यायालयीन निर्णयानुसार प्राथमिक पदवीधर शिक्षकांना सरसकट वेतनश्रेणी लागू करणे तसेच वाडी-वस्ती-तांड्यावर कार्यरत शिक्षकांची जुनी सेवा ग्राह्य धरून जुनी पेन्शन योजना लागू करणे आदी मागण्यांचा समावेश आहे.
शिक्षकांच्या न्याय्य हक्कांसाठी आणि शिक्षण व्यवस्थेच्या गुणवत्तेसाठी हे आंदोलन महत्त्वाचे असल्याचे सांगत जळगाव जिल्ह्यातील सर्व शिक्षकांनी मोठ्या संख्येने सहभागी होण्याचे आवाहन शिक्षक संघटनांकडून करण्यात आले आहे.
