गेवराई | प्रतिनिधी
मुक्ताईनगर येथून पंढरपूरकडे प्रस्थान केलेल्या संत मुक्ताबाईंच्या पालखी सोहळ्याचे आज (९ जुलै) सायंकाळी गेवराई शहरात आगमन होणार असून, शहरातील चिंतेश्वर महादेव मंदिरात पालखीचा मुक्काम राहणार आहे.
पालखीचे स्वागत नगराध्यक्षा गीताभाभी बाळराजे पवार यांच्या प्रमुख उपस्थितीत करण्यात येणार आहे. शहरातील डॉ. गणेश फलके यांच्या रुग्णालयाजवळ पालखीचे औपचारिक स्वागत होईल.
यापूर्वी पालखीचा मुक्काम वडीगोद्री येथे होता. तेथून पहाटे प्रस्थान करून शहागड मार्गे पालखी गेवराई शहरात दाखल होणार आहे. पालखीच्या आगमनानिमित्त शहरात भक्तिमय वातावरण निर्माण झाले असून भाविकांमध्ये उत्साहाचे वातावरण आहे.
नगराध्यक्षा गीताभाभी पवार यांनी गेवराई शहरातील सर्व वारकरी, भाविक आणि नागरिकांना संत मुक्ताबाईंच्या पालखीचे दर्शन घेऊन या सोहळ्याचा लाभ घ्यावा, असे आवाहन केले आहे.
