गेवराई | प्रतिनिधी
गेवराई शहरातील अंगणवाड्यांची सद्यस्थिती, पायाभूत सुविधा आणि वाढत्या लोकसंख्येनुसार आवश्यक उपाययोजनांचा आढावा घेण्यासाठी मंगळवारी (दि. ७) नगरपरिषद कार्यालयात आढावा बैठकीचे आयोजन करण्यात आले. नगराध्यक्षा गीताभाभी बाळराजे पवार आणि मुख्याधिकारी विक्रम मांडूरके यांच्या मार्गदर्शनाखाली ही बैठक पार पडली.
बैठकीस शहरातील विविध अंगणवाड्यांतील सेविका, मदतनीस, अंगणवाडी पर्यवेक्षिका श्रीमती बारकुल तसेच विविध प्रभागांतील नगरसेवक उपस्थित होते.
यावेळी शहरातील अंगणवाड्यांची सद्यस्थिती, स्वतंत्र जागा व इमारतींची उपलब्धता, शहरातील चार ठिकाणी नवीन अंगणवाडी इमारती उभारण्याचा प्रस्ताव, प्रत्येक प्रभागात वाढीव अंगणवाड्या सुरू करण्याची गरज, स्वच्छता व पोषण आहार व्यवस्थापन, गर्भवती माता आणि बालकांना अधिक दर्जेदार सेवा उपलब्ध करून देण्यासाठी आवश्यक उपाययोजनांवर सविस्तर चर्चा करण्यात आली.
तसेच गर्भवती महिलांची नोंदणी, त्यांच्या अडचणी, स्थानिक स्तरावरील विविध समस्या आणि त्यावरील उपाययोजनांबाबतही सकारात्मक चर्चा झाली. नगरसेवकांनी आपल्या प्रभागातील अंगणवाड्यांच्या समस्या मांडत वाढत्या लोकसंख्येनुसार नवीन अंगणवाड्या सुरू करण्याची आवश्यकता अधोरेखित केली.
बैठकीत बालकांचे आरोग्य, पोषण आणि पूर्वप्राथमिक शिक्षण अधिक प्रभावी करण्यासाठी आवश्यक सुविधा उपलब्ध करून देण्यावर भर देण्यात आला. अंगणवाडी सेवा अधिक सक्षम आणि परिणामकारक करण्यासाठी आवश्यक त्या उपाययोजना तातडीने राबविण्याचा निर्धार यावेळी व्यक्त करण्यात आला.
