अचलपूर | प्रतिनिधी
अमरावती ग्रामीण जिल्ह्यातील पथ्रोट पोलिसांनी अवैध शस्त्र बाळगणाऱ्यांविरोधात धडक कारवाई करत दोन देशी कट्टे, दोन मॅगझिन आणि तीन जिवंत काडतुसे जप्त केली आहेत. या कारवाईमुळे परिसरात खळबळ उडाली असून अवैध शस्त्रधारकांवर पोलिसांनी कठोर भूमिका घेतल्याचे स्पष्ट झाले आहे.
गुरुवार (दि. ९ जुलै) रोजी अमरावती ग्रामीणचे पोलीस अधीक्षक निकेतन कदम यांच्या मार्गदर्शनाखाली पथ्रोट पोलिसांनी गुप्त माहितीच्या आधारे अचलपूर येथील कसाबपूर परिसरात छापा टाकला. या कारवाईदरम्यान अनिकेत रविंद्र महाजन (वय २४, रा. कसाबपूर, अचलपूर) यांच्या घरातून दोन देशी कट्टे, दोन मॅगझिन आणि तीन जिवंत काडतुसे जप्त करण्यात आली.
या प्रकरणात शस्त्र पुरवठा करणारे आरोपी सध्या फरार असून त्यांचा शोध सुरू असल्याची माहिती पोलिसांनी दिली आहे. या प्रकरणाचा पुढील तपास पथ्रोट पोलीस करत आहेत.
पोलीस अधीक्षक निकेतन कदम यांनी सोशल मीडियावर शस्त्रांचे प्रदर्शन करून रिल्स बनविणारे, तसेच अवैध शस्त्रांची विक्री, खरेदी व बाळगणाऱ्यांविरोधात कठोर कारवाई करण्याचे निर्देश दिले आहेत.
ही कारवाई पोलीस अधीक्षक निकेतन कदम यांच्या मार्गदर्शनाखाली पोलीस निरीक्षक अभय चौतनकर तसेच पथ्रोट पोलीस पथकाने यशस्वीरीत्या पार पाडली.
