नाशिक | प्रतिनिधी
नाशिकच्या बहुप्रतिक्षित रिंग रोड प्रकल्पाला गती देण्यासाठी प्रशासनाने हालचाली वाढवल्या असून, प्रकल्पासाठी आवश्यक असलेल्या भूसंपादनाशी संबंधित प्रश्न तातडीने मार्गी लावण्याचे निर्देश देण्यात आले आहेत.
प्रकल्पग्रस्त शेतकऱ्यांना नियमानुसार योग्य मोबदला मिळावा तसेच भूसंपादन प्रक्रिया विनाविलंब पूर्ण करून रिंग रोडच्या कामाला वेग द्यावा, असे निर्देश संबंधित यंत्रणांना देण्यात आले आहेत.
नाशिक शहरातील वाढती वाहतूक कोंडी लक्षात घेता हा रिंग रोड प्रकल्प अत्यंत महत्त्वाचा मानला जात आहे. प्रकल्प पूर्ण झाल्यानंतर शहरातील अंतर्गत वाहतुकीवरील ताण कमी होण्यास मदत होईल, तसेच बाह्य वाहतूक शहरात न शिरता पर्यायी मार्गाने वळविणे शक्य होणार आहे.
याशिवाय रिंग रोडमुळे औद्योगिक, व्यापारी आणि आर्थिक विकासाला चालना मिळण्यासह शहराच्या नियोजित विस्तारालाही मोठी मदत होईल, अशी अपेक्षा व्यक्त करण्यात येत आहे. प्रशासनाने प्रकल्पातील अडथळे दूर करून कामाला गती देण्यावर भर दिला आहे.
