नाशिक | प्रतिनिधी
नाशिक शहरातील पंचवटी परिसरात अंमली पदार्थांविरोधात पोलिसांनी मोठी कारवाई करत ५१ किलो अफूचा साठा जप्त केला आहे. या कारवाईत एका आरोपीला अटक करण्यात आली असून त्याच्याकडून मोठ्या प्रमाणात मुद्देमालही जप्त करण्यात आला आहे.
पोलिसांना मिळालेल्या गोपनीय माहितीच्या आधारे ही कारवाई करण्यात आली. छाप्यामध्ये मोठ्या प्रमाणावर अफू जप्त करण्यात आली असून, संबंधित आरोपीला ताब्यात घेऊन त्याच्याविरुद्ध कायदेशीर कारवाई सुरू करण्यात आली आहे.
प्राथमिक तपासात या प्रकरणामागे अंमली पदार्थांच्या तस्करीचे मोठे जाळे असल्याचा संशय व्यक्त करण्यात येत आहे. या रॅकेटमध्ये आणखी कोणाचा सहभाग आहे, अंमली पदार्थांचा पुरवठा कुठून होत होता आणि त्याचे वितरण कुठे केले जात होते, याचा पोलिसांकडून सखोल तपास सुरू आहे.
या कारवाईमुळे अंमली पदार्थांच्या अवैध व्यवसायाला मोठा आघात बसल्याचे पोलिसांनी सांगितले असून, अशा प्रकारच्या बेकायदेशीर कारवायांविरोधात पुढेही कठोर कारवाई सुरू राहणार असल्याचे स्पष्ट करण्यात आले आहे.
