कुरुंदवाड | प्रतिनिधी :
भारत निवडणूक आयोगाच्या विशेष संक्षिप्त पुनरीक्षण कार्यक्रम (SIR-2026) अंतर्गत कुरुंदवाड नगरपरिषदेच्या माध्यमातून मतदार यादी अद्ययावत करण्याची मोहीम वेगाने सुरू आहे. या मोहिमेंतर्गत बूथ लेव्हल ऑफिसर (BLO) घरोघरी जाऊन मतदारांची माहिती संकलित करत असून, नागरिकांनी आवश्यक कागदपत्रांसह सहकार्य करावे, असे आवाहन करण्यात आले आहे.
मतदार यादीत नाव समाविष्ट करणे, नावातील दुरुस्ती करणे किंवा विद्यमान माहितीची खात्री करून घेण्यासाठी नागरिकांकडून उत्स्फूर्त प्रतिसाद मिळत आहे. ज्या नागरिकांची नावे मतदार यादीत नाहीत किंवा नव्याने समाविष्ट करावयाची आहेत, त्यांनी आधारकार्ड व पासपोर्ट आकाराचे छायाचित्र बीएलओंकडे सादर करावे, असे आवाहन करण्यात आले आहे.
कुरुंदवाड नगरपरिषदेचे मुख्याधिकारी मनोजकुमार देसाई यांनी मोहिमेची सविस्तर माहिती देत नागरिकांनी वेळेत आवश्यक माहिती व कागदपत्रे सादर करून सहकार्य करावे, असे सांगितले.
यावेळी लोकनियुक्त नगराध्यक्षा सौ. मनिषा डांगे यांनी सांगितले की, “प्रत्येक पात्र मतदाराने आपल्या कुटुंबातील सर्व सदस्यांची नावे मतदार यादीत अचूक असल्याची खात्री करून संबंधित अर्ज दि. २९ जुलै २०२६ पूर्वी बीएलओंकडे सादर करावेत. लोकशाही प्रक्रियेत प्रत्येक पात्र नागरिकाचा सहभाग सुनिश्चित करण्यासाठी मतदार यादीचे पुनरीक्षण अत्यंत महत्त्वाचे आहे.”
ही मोहीम प्रभावीपणे राबविण्यासाठी नगरपालिका कर्मचारी, अंगणवाडी सेविका, शिक्षक तसेच बीएलओ यांचे सहकार्य लाभत आहे. नागरिकांनी या संधीचा लाभ घेत मतदार नोंदणी, नावातील दुरुस्ती व इतर आवश्यक बदल निर्धारित मुदतीत पूर्ण करावेत, असे आवाहन कुरुंदवाड नगरपरिषदेच्या वतीने करण्यात आले आहे.
