कुरुंदवाड | प्रतिनिधी :
महाराष्ट्र राज्याचे माजी सहकार महर्षी व वस्त्रोद्योग राज्यमंत्री, मा. खासदार कल्लाप्पाण्णा आवाडे यांच्या ९६ व्या वाढदिवसानिमित्त कुरुंदवाड येथील कुमार विद्या मंदिर, भैरववाडी या जिल्हा परिषद प्राथमिक शाळेत विद्यार्थ्यांना वह्या व शालेय शैक्षणिक साहित्याचे वाटप करण्यात आले.
कार्यक्रमाला कुरुंदवाडचे नूतन नगरसेवक रमेश आण्णा भुजूगडे उपस्थित होते. यावेळी ते म्हणाले, “ग्रामीण भागातील शाळा आणि विद्यार्थ्यांचा सर्वांगीण विकास व्हावा, यासाठी अशा उपक्रमांची नितांत गरज आहे. मा. खासदार कल्लाप्पाण्णा आवाडे यांनी हा उपयुक्त उपक्रम राबविल्याबद्दल त्यांचे मनःपूर्वक आभार.”
यावेळी माजी नगरसेवक उदय डांगे यांनी विद्यार्थ्यांना सातत्यपूर्ण अभ्यासाची सवय लावण्याबरोबरच शारीरिक व शैक्षणिक सर्वांगीण विकासावर भर देण्याचे आवाहन केले.
सामाजिक कार्यकर्ते आप्पासो गावडे, श्रीकांत खिलारे आदी मान्यवरांच्या हस्ते विद्यार्थ्यांना वह्यांचे वाटप करण्यात आले.
कार्यक्रमाच्या प्रारंभी शाळेचे मुख्याध्यापक संजय गायकवाड यांनी उपस्थित मान्यवरांचे स्वागत करून प्रास्ताविक केले. यावेळी रियाज बाणदार सर, पिष्टे मॅडम, अभिनंदन कांबळे, पालक, शिक्षक तसेच विद्यार्थी-विद्यार्थिनी मोठ्या संख्येने उपस्थित होते.
कार्यक्रमाचे सूत्रसंचालन रियाज बाणदार सर यांनी केले, तर पिष्टे मॅडम यांनी उपस्थितांचे आभार मानले.
