खारपाडा (पेण) | प्रतिनिधी :
खारपाडा येथील श्री. भालचंद्र मंगळ्या घरत यांच्या कन्या कै. संस्कृती भालचंद्र घरत (सोनू) यांचे मंगळवार, दि. २१ जुलै २०२६ रोजी सायंकाळी ६.१५ वाजता अल्पशा आजाराने दुःखद निधन झाले. त्या अवघ्या १८ वर्षांच्या होत्या. त्यांच्या निधनाने घरत कुटुंबासह संपूर्ण परिसरात शोककळा पसरली आहे.
जन्मतःच दोन्ही डोळ्यांनी दिसत नसतानाही संस्कृती यांनी आपल्या जिद्द, चिकाटी आणि आत्मविश्वासाच्या बळावर जीवनात अनेक आव्हानांवर मात केली. त्यांनी डोंबिवली येथील स्नेहांकित हेल्पलाइन संस्थेत ब्रेल लिपीचे शिक्षण घेतले आणि नरेंद्र कॉन्व्हेंट हायस्कूलमधून बारावी (वाणिज्य शाखा) परीक्षेत ५७ टक्के गुण मिळवत आपल्या कर्तृत्वाची छाप उमटवली.
संस्कृती यांना गायनाची विशेष आवड होती. ओळखीच्या व्यक्तींना केवळ त्यांच्या आवाजावरून आणि हालचालींवरून ओळखण्याची विलक्षण क्षमता त्यांच्यात होती. त्यांचा प्रेमळ, मनमिळावू आणि सकारात्मक स्वभाव सर्वांना आपलासा वाटायचा. शारीरिक मर्यादा कधीही कमकुवतपणा न मानता त्यांनी जिद्दीने जीवन जगत अनेकांसाठी प्रेरणादायी उदाहरण निर्माण केले.
गेल्या काही दिवसांपासून त्यांच्यावर रुग्णालयात उपचार सुरू होते. मात्र उपचारादरम्यान त्यांची प्राणज्योत मालवली. त्यांच्या निधनाने कुटुंबीयांवर दुःखाचा डोंगर कोसळला असून परिसरातून हळहळ व्यक्त केली जात आहे.
त्यांच्या पश्चात वडील भालचंद्र मंगळ्या घरत, आई वृषाली भालचंद्र घरत, भाऊ रुद्रांश भालचंद्र घरत, काका रामशेठ मंगळ्या घरत, काकू सुरेखा रामशेठ घरत तसेच अन्य नातेवाईक असा परिवार आहे.
त्यांच्या पार्थिवावर अंत्यसंस्कारावेळी आप्तेष्ट, नातेवाईक तसेच अध्यात्मिक, सामाजिक, राजकीय, शैक्षणिक क्षेत्रातील अनेक मान्यवरांनी उपस्थित राहून भावपूर्ण श्रद्धांजली अर्पण केली.
दशक्रिया विधी गुरुवार, दि. ३० जुलै २०२६ रोजी श्री क्षेत्र नाशिक येथे होणार असून, उत्तरकार्य (तेरावा) रविवार, दि. २ ऑगस्ट २०२६ रोजी त्यांच्या राहत्या घरी खारपाडा, पेण येथे संपन्न होणार आहे.
संस्कृती घरत यांची संघर्षमय, प्रेरणादायी आणि सकारात्मक जीवनयात्रा अनेकांच्या स्मरणात कायम राहील. त्यांच्या निधनाने एक जिद्दी, गुणी आणि प्रेमळ व्यक्तिमत्त्व काळाच्या पडद्याआड गेले आहे. त्यांच्या पवित्र स्मृतीस भावपूर्ण श्रद्धांजली.
