जालना : तालुक्यातील हिवरा तपेश्वर परिसरातील श्री क्षेत्र विठ्ठल माळावर आषाढी एकादशीनिमित्त शनिवारी पहाटेपासूनच भक्तांची मोठी गर्दी उसळली. वैकुंठवासी श्री.म्हातारबाबा शिंदे खणेपुरीकर यांच्या प्रेरणेने उभारण्यात आलेल्या या पवित्र क्षेत्रात जिल्ह्यासह पंचक्रोशीतील खणेपुरी , भाटेपुरी, थेरगाव,हिवरा तपेश्वर , हातवन, बापकळ , उटवत विविध गावांतून आलेल्या हजारो भाविकांनी विठ्ठल-रुक्मिणीचे दर्शन घेतले.
मंदिर परिसरात दिवसभर भजन, कीर्तन, हरिपाठ आणि विठ्ठल नामाच्या अखंड गजराने संपूर्ण वातावरण भक्तिमय झाले होते. विविध गावांतून आलेल्या दिंड्यांनी टाळ-मृदुंगाच्या गजरात मंदिरात प्रवेश करून विठुरायाच्या चरणी नतमस्तक होत दर्शनाचा लाभ घेतला.
मंदिर समितीच्या वतीने भाविकांसाठी पिण्याचे पाणी, फराळ, बसण्याची व्यवस्था तसेच इतर आवश्यक सुविधा उपलब्ध करून देण्यात आल्या होत्या. पोलिस प्रशासनानेही चोख बंदोबस्त ठेवल्याने संपूर्ण सोहळा शांततेत आणि उत्साहात पार पडला.
यावेळी मंदिर परिसरात भरलेल्या जत्रेलाही भाविकांनी मोठी पसंती दिली. लहान भक्तांनी खेळणी, पाळणे, विविध खाद्यपदार्थ आणि मनोरंजनाच्या साधनांचा मनमुराद आनंद लुटला. त्यामुळे धार्मिक उत्सवासोबतच जत्रेचे आकर्षणही भाविकांसाठी विशेष ठरले.
श्रद्धा, भक्ती आणि उत्साहाने भरलेल्या या सोहळ्यात दिवसभर हजारो भाविकांनी विठुरायाचे दर्शन घेत आषाढी एकादशी मोठ्या भक्तिभावाने साजरी केली.
