नाशिक | प्रतिनिधी
नाशिक, १४ ऑगस्ट २०२६ : युथएड एंटरप्रेन्युअर्स फेडरेशन ऑफ इंडिया (YEFi) यांच्या वतीने नाशिक जिल्ह्यातील उद्योजिकांसाठी जिल्हा उद्योजक सदस्य बैठक १४ ऑगस्ट २०२६ रोजी सी.वाय.डी.ए. कौशल्य विकास केंद्र, नाशिक येथे आयोजित करण्यात आली. या बैठकीस नाशिक जिल्ह्यातील सुमारे ४० उद्योजिका उपस्थित होत्या.
कार्यक्रमास महाराष्ट्र राज्य ग्रामीण जीवनोन्नती अभियान (उमेद)चे श्री. स्वप्निल शिर्के प्रमुख पाहुणे म्हणून उपस्थित होते. तसेच युथएड एंटरप्रेन्युअर्स फेडरेशन ऑफ इंडियाच्या संचालक सौ. ज्योत्स्ना बहिरट यांची प्रमुख उपस्थिती होती.
उद्योजकांना एकत्रित व्यासपीठ उपलब्ध करून देणे, व्यवसायवृद्धीच्या संधी निर्माण करणे, ब्रँडिंग, बाजारपेठेशी जोडणी, डिजिटल माध्यमांचा प्रभावी वापर तसेच उद्योजकांमधील परस्पर संपर्क व सहकार्य वाढविणे हा बैठकीचा प्रमुख उद्देश होता.
या कार्यक्रमादरम्यान पूनम सहाणे यांची युथएड एंटरप्रेन्युअर्स फेडरेशन ऑफ इंडिया, नाशिक जिल्हा ब्रँड अॅम्बेसेडर म्हणून निवड करण्यात आली. तसेच YEFiच्या सदस्यांना प्रमाणपत्रांचे वितरण करण्यात आले.
नवकल्पना, ब्रँडिंग आणि बाजारपेठेतील संधींवर पॅनेल चर्चा
कार्यक्रमात “नवकल्पना, ब्रँडिंग आणि बाजारपेठेतील संधींच्या माध्यमातून सूक्ष्म व लघु उद्योगांचा विस्तार” या विषयावर विशेष पॅनेल चर्चा आयोजित करण्यात आली.
या चर्चेचे सूत्रसंचालन श्री. योगेश पाटील, व्यवस्थापकीय संचालक, वॉश मित्र यांनी केले.
पॅनेल चर्चेत श्री. नितीन कापुरे, गट अभियान व्यवस्थापक, निफाड, महाराष्ट्र राज्य ग्रामीण जीवनोन्नती अभियान (उमेद); सौ. सुनंदा मधुकर निंबाळकर, यशोदिनी ऑर्गॅनिक्स; तसेच श्री. रवींद्र पवार, सह्याद्री रुरल डेव्हलपमेंट फाउंडेशन यांनी सहभाग घेतला.
चर्चेदरम्यान व्यवसायवृद्धी, प्रभावी ब्रँडिंग, बाजारपेठेशी जोडणी, ग्राहकांचा विश्वास निर्माण करणे, संस्थात्मक सहकार्य, डिजिटल माध्यमांचा वापर आणि व्यवसायाचा विस्तार याबाबत मार्गदर्शन करण्यात आले. उद्योजिकांनीही आपल्या व्यवसायातील अनुभव, अडचणी आणि भविष्यातील संधी याबाबत संवाद साधला.
या बैठकीच्या माध्यमातून उद्योजिकांना परस्पर परिचय, अनुभवांची देवाणघेवाण, नेटवर्किंग तसेच भविष्यातील व्यवसायविषयक सहकार्य आणि संधींबाबत चर्चा करण्यासाठी प्रभावी व्यासपीठ मिळाले.
कार्यक्रमास श्री. अविनाश सोनवणे, श्री. सौरभ गिरीगोसावी, श्री. हर्ष फपाळ, श्री. श्यामकांत सोनावणे, दिपाली पवार, दिपाली भारस्कर व उर्वशी बोरसे यांची उपस्थिती होती.
