श्रीगोंदा : प्रतिनिधी
श्रीगोंदा तालुक्यातील मढेवडगाव येथे माजी सैनिक संघटना व न्यू इंग्लिश स्कूल यांच्या संयुक्त विद्यमाने रक्षाबंधनानिमित्त सीमेवर कर्तव्य बजावणाऱ्या सैनिक बांधवांसाठी राख्या पाठविण्याचा अनोखा उपक्रम राबविण्यात आला.
गेल्या चार वर्षांपासून रक्षाबंधनाच्या पवित्र सणानिमित्त देशाच्या सीमेवर अहोरात्र पहारा देत मातृभूमीचे रक्षण करणाऱ्या सैनिक बांधवांना शाळेतील विद्यार्थिनी स्वतःच्या हाताने तयार केलेल्या राख्या पाठवत आहेत. यंदाही विद्यार्थिनींनी मोठ्या उत्साहाने सुंदर राख्या तयार करून त्या सीमेवरील सैनिकांना पाठविल्या.
देशाच्या सीमेवर कर्तव्य बजावणाऱ्या सैनिकांप्रती आदर, कृतज्ञता आणि आपुलकी व्यक्त करण्यासाठी हा उपक्रम सुरू करण्यात आला आहे. सैनिकांच्या त्यागाची जाणीव विद्यार्थ्यांमध्ये निर्माण व्हावी तसेच सैनिकांशी आपुलकीचे नाते जोडले जावे, या भावनेतून हा उपक्रम सातत्याने राबविण्यात येत असल्याचे आयोजकांनी सांगितले.
“सीमेवर उभ्या असलेल्या आपल्या सैनिकांमुळे आपण सण-उत्सव आनंदाने साजरे करू शकतो. त्यांच्या त्यागाची जाणीव विद्यार्थ्यांना व्हावी आणि सैनिकांप्रती आदराची भावना निर्माण व्हावी, या उद्देशाने हा उपक्रम राबविण्यात येत आहे,” अशी भावना यावेळी व्यक्त करण्यात आली.
या उपक्रमासाठी मुख्याध्यापक हौसराव दांगडे, पर्यवेक्षक विलास सुलाखे, रामदास पवार, संतोष भोईटे, विकास चव्हाण, शंकर यडलोड, प्रणव नलगे, मीनाक्षी कदम, सुजाता डाके आणि महादेवी माने यांचे सहकार्य लाभले.
विद्यार्थिनींनी स्वतःच्या हाताने तयार केलेल्या राख्यांमधून सीमेवरील सैनिकांप्रती व्यक्त केलेली कृतज्ञता आणि आपुलकीचा हा उपक्रम समाजासाठी प्रेरणादायी ठरत आहे.
