रोटी (ता. दौंड) : वाढदिवस तसेच विविध सामाजिक व कौटुंबिक समारंभांना पर्यावरण संवर्धनाची जोड देत सोशल डेव्हलपमेंट ऑर्गनायझेशन व रोटी ग्रामस्थांच्या सहकार्याने रोटी गावामध्ये वृक्षलागवड व परिसर संवर्धनाचा उपक्रम राबविण्यात येत आहे.
वाढदिवस, लग्नसमारंभ तसेच इतर आनंदाच्या प्रसंगी केवळ उत्सव साजरा न करता त्या दिवसाची कायमस्वरूपी आठवण म्हणून एक झाड लावण्याचा उपक्रम संस्थेच्या माध्यमातून सुरू करण्यात आला आहे. या उपक्रमातून नागरिकांमध्ये वृक्षलागवडीबरोबरच पर्यावरण संरक्षण आणि झाडांच्या संगोपनाबाबत जनजागृती करण्याचा प्रयत्न केला जात आहे.
वृक्षलागवड केल्यानंतर त्या झाडांचे नियमित संगोपन, पाणी देणे, संरक्षण करणे तसेच झाडांची योग्य वाढ होण्यासाठी आवश्यक ती काळजी घेण्यावरही भर देण्यात येत आहे. त्यामुळे केवळ झाडे लावण्यापुरता हा उपक्रम मर्यादित न ठेवता “लावा, जगवा आणि वाढवा” या संकल्पनेतून परिसर हिरवागार करण्याचा प्रयत्न केला जात आहे.
रोटी गावातील नागरिकांनी आपल्या वाढदिवसाच्या किंवा कोणत्याही आनंदाच्या समारंभाच्या निमित्ताने एक झाड लावावे आणि त्या झाडाच्या संगोपनाची जबाबदारी घ्यावी, असे आवाहन करण्यात आले आहे.
“आजचे एक रोप म्हणजे उद्याची सावली, शुद्ध हवा आणि पुढील पिढीसाठी सुंदर पर्यावरण” या उद्देशाने सुरू असलेल्या या उपक्रमाला ग्रामस्थांचा सकारात्मक प्रतिसाद मिळत असून, रोटी गाव अधिक हिरवेगार व पर्यावरणपूरक करण्यासाठी हा उपक्रम सातत्याने पुढे नेण्यात येणार आहे.
सोशल डेव्हलपमेंट ऑर्गनायझेशन व रोटी ग्रामस्थांच्या सहकार्याने सुरू असलेला हा उपक्रम पर्यावरण संवर्धनाबरोबरच सामाजिक सहभागाचा प्रेरणादायी संदेश देत आहे.
