श्रावण सोमवारनिमित्त कणकोरी, कोळघर व मालुंजा बुद्रुक येथील महिलांसाठी जातेगाव येथील महादेवाच्या दर्शनासाठी तीन बसचे आयोजन करण्यात आले. ग्रुप ग्रामपंचायत कनकोरी-कोळघर-मालुंजा बुद्रुकचे सरपंच माननीय जगदीशभाऊ साळुंके तसेच पंचायत समिती सदस्य सौ. मोहिनीताई जगदीशभाऊ साळुंके यांच्या वतीने या धार्मिक उपक्रमाचे आयोजन करण्यात आले.
जातेगाव येथील उंच व भव्य डोंगरावर विराजमान असलेले मोठे महादेव मंदिर हे परिसरातील भाविकांचे श्रद्धास्थान आहे. डोंगरावरील निसर्गरम्य वातावरण, मंदिराची भव्यता आणि भक्तिमय वातावरणामुळे महिलांमध्ये महादेवाच्या दर्शनासाठी मोठा उत्साह पाहायला मिळाला.
या उपक्रमात केवळ महिलांनी सहभाग घेतला. महादेवाच्या दर्शनावेळी ‘हर हर महादेव’च्या जयघोषाने संपूर्ण परिसर भक्तिमय झाला.
महिलांना श्रावण सोमवारच्या पवित्र दिवशी महादेवाचे दर्शन घेता यावे, या उद्देशाने राबविण्यात आलेल्या या उपक्रमाचे महिलांकडून कौतुक करण्यात आले. यापुढेही महिला व ग्रामस्थांसाठी अशाच प्रकारचे विविध सामाजिक, धार्मिक व जनहिताचे उपक्रम राबविण्याचा मानस सरपंच जगदीशभाऊ साळुंके व पंचायत समिती सदस्य सौ. मोहिनीताई साळुंके यांनी व्यक्त केला.
या उपक्रमासाठी सहकार्य करणाऱ्या सर्वांचे तसेच आयोजनाबद्दल सरपंच व पंचायत समिती सदस्यांचे ग्रामस्थांनी मनःपूर्वक आभार मानले.
