प्रतिनिधी नित्यानंद मोरे.
पुणे : वाईच्या तहसीलदार तसेच त्यांच्या पती असलेल्या पशुधन विकास अधिकाऱ्यांच्या कथित गैरकारभाराची सखोल चौकशी करून त्यांच्यावर कठोर कारवाई करावी आणि दोषी आढळल्यास सेवेतून बडतर्फ करावे, या मागणीसाठी शिवशक्ती भीमशक्तीच्या वतीने विभागीय आयुक्त, पुणे यांच्याकडे निवेदन सादर करण्यात आले. संबंधित प्रकरणात तातडीने कारवाई न झाल्यास महसूलमंत्र्यांच्या बंगल्याबाहेर आंदोलन करण्याचा इशारा यावेळी देण्यात आला.
वाई तहसीलदार यांच्या कार्यशैलीबाबत तसेच त्यांच्या पती, पशुधन विकास अधिकारी यांच्या कथित गैरप्रकारांबाबत गंभीर आरोप करण्यात आले आहेत. धोम पाटबंधारे विभागाच्या जागेवर अतिक्रमण करून बंगला उभारल्याचा आरोप, गौण खनिज उत्खननातील कथित भ्रष्टाचार तसेच पदाचा गैरवापर केल्याच्या आरोपांची चौकशी करण्याची मागणी निवेदनातून करण्यात आली आहे.
या विविध मुद्द्यांवर राष्ट्रीय मराठा महासंघ आणि पीपल्स रिपब्लिकन पार्टीच्या वतीने शिवशक्ती भीमशक्तीचे संयुक्त लक्षवेधी उपोषण दिनांक 12, 13 आणि 14 ऑगस्ट रोजी वाई तालुक्यात करण्यात आले होते. या उपोषणाच्या पार्श्वभूमीवर उपविभागीय अधिकारी, वाई यांनी तहसीलदार वाई यांचा कार्यभार बदला व इतर बाबींवर जिल्हाधिकारी यांच्याकडे अहवाल सादर केल्याचे आंदोलकांनी सांगितले.
मात्र, संबंधित प्रकरणात अद्याप अपेक्षित ती कठोर कारवाई झालेली नसल्याने आता विभागीय आयुक्तांकडे तक्रार दाखल करण्यात आली आहे. या प्रकरणाची निष्पक्ष व सखोल चौकशी करून दोषींवर कठोर प्रशासकीय कारवाई करावी, अशी मागणी करण्यात आली.
विभागीय आयुक्तांकडे तक्रार दाखल करताना राष्ट्रीय मराठा महासंघाचे जिल्हाध्यक्ष विक्रम वाघ, पीपल्स रिपब्लिकन पार्टीचे सातारा जिल्हा महासचिव प्रणित मोरे आणि वाई तालुका अध्यक्ष विजय भाऊ सातपुते उपस्थित होते.
संबंधित आरोपांची शासनाने गांभीर्याने दखल घेऊन तातडीने चौकशी करावी आणि दोषी आढळणाऱ्या अधिकाऱ्यांवर नियमानुसार कठोर कारवाई करावी, अशी मागणी यावेळी करण्यात आली. कारवाईला विलंब झाल्यास महसूलमंत्र्यांच्या बंगल्याबाहेर आंदोलन छेडण्यात येईल, असा स्पष्ट इशाराही शिवशक्ती भीमशक्तीच्या पदाधिकाऱ्यांनी दिला.
