जळगाव : साखरेच्या वाढत्या दराचा निषेध करण्यासाठी ठाकरे गटाच्या वतीने जळगावात अनोख्या पद्धतीने आंदोलन करण्यात आले. साखर दरवाढीच्या निषेधार्थ आंदोलकांनी चक्क बिनसाखरेचा चहा तयार करून सरकारच्या धोरणांचा निषेध केला.
महागाईने सर्वसामान्यांचे कंबरडे मोडले असताना जीवनावश्यक वस्तूंच्या किमती सातत्याने वाढत आहेत. त्यातच साखरेच्या दरवाढीचा फटका सर्वसामान्यांच्या घरगुती बजेटला बसत असल्याचा आरोप आंदोलनकर्त्यांनी केला.
आंदोलनादरम्यान महिला कार्यकर्त्यांनी रस्त्यावरच चहाचे साहित्य आणून ‘साखर नको, सरकारला जाब द्या!’ अशा घोषणा देत निषेध व्यक्त केला. बिनसाखरेचा चहा तयार करून तो पिण्याच्या माध्यमातून सरकारच्या धोरणांवर जोरदार प्रहार करण्यात आला.
या अनोख्या आंदोलनामुळे परिसरात नागरिकांचे लक्ष वेधले गेले. साखरेच्या दरवाढीवर तातडीने नियंत्रण आणून सर्वसामान्यांना दिलासा द्यावा, अशी मागणी ठाकरे गटाच्या वतीने करण्यात आली.
