— शहराध्यक्ष महेश निकम यांचा नगरपंचायत प्रशासनाला इशारा
गणेशोत्सवापूर्वी पोलादपूर शहरातील रस्ते दुरुस्त करण्याची मागणी; नगराध्यक्ष व मुख्याधिकाऱ्यांना निवेदन
पोलादपूर शहरातील विविध रस्त्यांवर पडलेल्या मोठमोठ्या खड्ड्यांबाबत भाजपा पोलादपूर शहराध्यक्ष महेश निकम यांनी पुन्हा एकदा नगरपंचायत प्रशासनाचे लक्ष वेधले आहे. यासंदर्भात मा. नगराध्यक्ष मॅडम तसेच मुख्याधिकारी, नगरपंचायत पोलादपूर यांना आज निवेदन देण्यात आले.
यापूर्वी दि. १३ जुलै रोजी शहराध्यक्ष महेश निकम यांनी मुख्याधिकारी, नगरपंचायत पोलादपूर यांना पत्र देऊन शहरातील खड्डे तात्काळ बुजविण्याची मागणी केली होती. मात्र, पत्र देऊनही अद्याप अनेक ठिकाणचे खड्डे बुजविण्यात आलेले नसल्याने महेश निकम यांनी प्रशासनाच्या कार्यपद्धतीबाबत नाराजी व्यक्त केली.
विशेषतः वॉर्ड क्रमांक १४ व १५ मधून जाणाऱ्या बाजारपेठेतील रस्त्यावर मोठ्या प्रमाणात खड्डे पडले असून, नागरिक व वाहनचालकांना त्याचा त्रास सहन करावा लागत आहे. यापूर्वी स्थानिक नगरसेविका सौ. अंकिता महेश निकम यांनी स्वतः पुढाकार घेऊन या भागातील खड्डे बुजविले होते.
आता गणेशोत्सव अवघ्या काही दिवसांवर येऊन ठेपला असल्याने शहरातील रस्त्यांची तातडीने दुरुस्ती करणे आवश्यक आहे. गणेशोत्सवापूर्वी पोलादपूर शहरातील खड्डे बुजविण्यात यावेत, अशी ठाम मागणी शहराध्यक्ष महेश निकम यांनी केली आहे.
यावेळी बोलताना शहराध्यक्ष महेश निकम यांनी सांगितले की, नागरिकांच्या सुरक्षिततेचा प्रश्न असून यापूर्वी पत्र देऊनही खड्डे बुजविण्यात आलेले नाहीत. आता दिलेल्या निवेदनाची प्रशासनाने गांभीर्याने दखल घेऊन तातडीने कार्यवाही करावी. गणेशोत्सवापूर्वी खड्डे बुजविण्यात आले नाहीत, तर खड्ड्यांमध्ये बसून आंदोलन करण्याचा इशारा महेश निकम यांनी दिला आहे.
यावेळी पोलादपूर युवा मोर्चा तालुका अध्यक्ष सनी जाधव उपस्थित होते.
