टेंभुर्णी : राष्ट्रीय समाज पक्षाच्या मागणीला अखेर यश आले असून, आजपासून टेंभुर्णी बसस्थानकातून टेंभुर्णी–अकलूज नवीन एसटी बससेवेची पहिली फेरी सुरू करण्यात आली.
या बससेवेचे टाकळी येथे राष्ट्रीय समाज पक्ष व टाकळी ग्रामस्थांच्या वतीने बसचे पूजन करून उत्साहात स्वागत करण्यात आले. यावेळी बसचे चालक व वाहक यांचा सत्कार करण्यात आला. तसेच राष्ट्रीय समाज पक्षाच्या मागणीची तातडीने दखल घेऊन बससेवा सुरू केल्याबद्दल टेंभुर्णी बसस्थानकाच्या व्यवस्थापकांचे आभार मानण्यात आले.
ही बससेवा टेंभुर्णी, आढेगाव, वडोली, चांदज, टाकळी (टे), गार अकोले, बावडा मार्गे अकलूज अशी राहणार आहे. या बससेवेमुळे परिसरातील विद्यार्थी, महिला, ज्येष्ठ नागरिक, शेतकरी तसेच सर्वसामान्य प्रवाशांना अकलूज व मार्गावरील गावांमध्ये ये-जा करण्यासाठी मोठी सुविधा उपलब्ध होणार आहे.
यावेळी बसपूजन कार्यक्रमास राष्ट्रीय समाज पक्षाचे नेते आजीनाथ गोफणे, जिल्हा उपाध्यक्ष बाळासाहेब नगरे, युवक जिल्हाध्यक्ष दत्ता काळे, माढा तालुकाध्यक्ष हनुमंत खांडेकर, तसेच पक्षाचे पदाधिकारी, कार्यकर्ते आणि टाकळी येथील ग्रामस्थ मोठ्या संख्येने उपस्थित होते.
राष्ट्रीय समाज पक्षाच्या मागणीला यश; नवीन एसटी बससेवेमुळे परिसरातील दळणवळणाला मिळणार नवी गती!
