अतनूर, ता. जळकोट, जि. लातूर : गावातील डॉक्टर आणि हॉस्पिटल चालकांनी नागरिकांच्या माहितीसाठी आवश्यक शैक्षणिक पात्रता, वैध Registration Certificate/License, हॉस्पिटलची नोंदणी व आवश्यक परवाने, GST क्रमांक तसेच इतर संबंधित कागदपत्रे नियमांनुसार उपलब्ध व पारदर्शकपणे प्रदर्शित करावीत, अशी मागणी नागरिकांमधून होत आहे.
वैद्यकीय सेवा देणाऱ्या संबंधित व्यक्तींकडे आवश्यक शैक्षणिक पात्रता व वैध नोंदणी आहे का, याबाबत नागरिकांना स्पष्ट माहिती मिळणे गरजेचे आहे. आवश्यक कागदपत्रे उपलब्ध नसतील किंवा ती जाणीवपूर्वक नागरिकांपासून लपवली जात असतील, तर हा गंभीर विषय असून सक्षम आरोग्य प्रशासनाने त्याची दखल घेण्याची गरज व्यक्त होत आहे.
वैद्यकीय व्यवसाय करण्यासाठी आवश्यक पात्रता व वैध नोंदणी नसलेल्या व्यक्तींनी उपचार करू नयेत, अशी स्पष्ट भूमिका नागरिकांकडून मांडण्यात येत आहे. अशा प्रकारची प्रकरणे आढळल्यास त्याची माहिती आरोग्य प्रशासन आणि संबंधित सक्षम शासकीय प्राधिकरणाकडे देऊन नियमानुसार चौकशी व आवश्यक कायदेशीर कारवाई करण्याची मागणी करण्यात येणार आहे.
हा इशारा कोणत्याही विशिष्ट व्यक्तीला लक्ष्य करण्यासाठी नसून, नागरिकांच्या आरोग्याची सुरक्षितता आणि वैद्यकीय क्षेत्रातील पारदर्शकता राखण्यासाठी असल्याचे स्पष्ट करण्यात आले आहे.
दरम्यान, नागरिकांनीही जागरूक राहून डॉक्टरांची शैक्षणिक पात्रता, वैध नोंदणी आणि संबंधित वैद्यकीय आस्थापनाची अधिकृतता याबाबत माहिती घेऊनच उपचार घ्यावेत, असे आवाहन करण्यात आले आहे.
“नागरिकांच्या आरोग्याशी खेळ करू नका”, असा थेट इशारा देत वैद्यकीय सेवांमध्ये नियमांचे पालन आणि पारदर्शकता राखण्याची मागणी करण्यात आली आहे.
