(उपकार्यकारी अभियंताला दिले निवेदन)
आज दिनांक 24/ 8/ 2026 ला सुरगाव ग्रामस्थांनी श्याम वानखेडे माजी उपसरपंच ग्रामपंचायत सूरगाव यांच्या मार्गदर्शनात उपकार्यकारी अभियंता सेलू यांना स्मार्ट मीटर च्या विरोधात निवेदन दिले.
याप्रसंगी उपकार्यकारी अभियंता यांनी समस्त सुरगाव ग्रामस्थांना सामोरे जाऊन निवेदन स्वीकारले यावेळी महिला भगिनी युवकांनी तसेच जेष्ठ नागरिकांनी आपली व्यथा मांडली. स्मार्ट मीटरच्या विरोधात आपली भूमिका मांडताना महिला वर्गाने सांगितले की आम्हाला नवीन स्मार्ट मीटर बसवले नाही तर कोणत्याही शासकीय योजनांचा लाभ ग्रामस्थांना मिळणार नाही तसेच पुढे जाऊन तुम्हाला काही हजार रुपये खर्च करून मीटर घ्यावे लागेल अशी खोटी बतावणी करून व अक्षरशः मूर्ख बनवून नवीन स्मार्ट मीटर बसविण्यात आले. उसनवार करून वाढीव बिल नाईलाजास्तव भरावे लागते असे महिला वर्गाने सांगितले.
तसेच ज्येष्ठ नागरिकांनी नवीन स्मार्ट मीटर म्हणजे आमदनी अठन्नी व खर्च 12 आणा असे सांगताना वाढीव बिल भरताना मोठी दमछाक होत आहे असे सांगितले तर युवा वर्गाने सांगितले की बिलाची मुदत संपल्यावर केव्हाही लाईन बंद होते त्यामुळे मीटर बदलल्या गेले नाही तर स्मार्ट मीटरची आम्ही सनदशीर मार्गाने अंत्ययात्रा काढू असे सांगितले.
सर्वांची व्यथा ऐकून उपकार्यकारी अभियंता सेलू यांनी निवेदन स्वीकारून येत्या दोन दिवसात प्रत्यक्ष गावातील बैठक लावण्याचे व जुने मीटर बसवून देण्याबाबत आश्वस्त केले. यावेळी ग्रामस्थांनी स्मार्ट मीटरच्या विरोधात घोषणा देत जुनेच मीटर बसून देण्याची एकमुखी मागणी केली. या निवेदनासाठी सर्वश्री वैभव वानखेडे वैभव मेहता शुभम गायकवाड सुरज चौधरी मनोज कांबळे गणेश वरठी जानराव खंडाते रवींद्र भगत रामेश्वर मेश्राम मारुती कुबडे तसेच समस्त ग्रामस्थ महिला भगिनी यांनी सहकार्य केले.
