सुरेंद्र सोनवणे,प्रतिनिधी लोणी : धामणी गावातील शंभर वर्षांची धार्मिक परंपरा लाभलेल्या श्रीकृष्ण जन्मोत्सवाच्या शताब्दी महोत्सवाचा शुभारंभ रविवारी धर्मध्वज उभारणीच्या मंगल सोहळ्याने भक्तिमय वातावरणात झाला. या सोहळ्यास वारकरी संप्रदायातील संत-महंत, ग्रामस्थ, वारकरी आणि भाविक मोठ्या संख्येने उपस्थित होते.
वारकरी संप्रदायाचे ह.भ.प.विष्णू महाराज केंद्रे, जगद्गुरु संत तुकाराम महाराजांचे दहावे वंशज ह.भ.प.माणिक महाराज मोरे तसेच आळंदी येथील श्री ज्ञानेश्वर माऊली दिंडी सोहळ्याचे चोपदार राजाभाऊ चोपदार यांच्या प्रमुख उपस्थितीत धर्मध्वजाचे विधिवत पूजन करण्यात आले. त्यानंतर धर्मध्वज उभारण्यात येऊन शताब्दी महोत्सवाच्या धार्मिक कार्यक्रमांना सुरुवात झाली.
धर्मध्वज फडकताच उपस्थित भाविकांनी जयघोष करत परिसर दुमदुमून सोडला. ‘श्रीकृष्ण भगवान की जय’ तसेच विठ्ठल नामाच्या गजराने संपूर्ण धामणी नगरी भक्तिरसात न्हाऊन निघाली.
श्रीकृष्ण जन्मोत्सवाला शंभर वर्षांची परंपरा असल्याने यंदाचा शताब्दी महोत्सव ग्रामस्थांसाठी विशेष महत्त्वाचा ठरत आहे. या निमित्ताने गावात विविध धार्मिक, आध्यात्मिक आणि सांस्कृतिक कार्यक्रमांचे आयोजन करण्यात येणार असून, परिसरातील भाविक मोठ्या संख्येने सहभागी होणार आहेत.
शताब्दी महोत्सवाच्या माध्यमातून धामणी गावातील पारंपरिक वारकरी संस्कृती, धार्मिक परंपरा आणि भक्तीचा जागर होणार असल्याने ग्रामस्थांमध्ये उत्साहाचे वातावरण निर्माण झाले आहे. धर्मध्वज उभारणीच्या सोहळ्याने शताब्दी महोत्सवाला मंगलमय सुरुवात झाल्याचे चित्र पाहायला मिळाले.
