पर्यावरणपूरक गणेशोत्सवाचा संदेश देत विद्यार्थ्यांनी साकारल्या गणेशमूर्ती
देवळा | २७ ऑगस्ट २०२६
मातीशी नाते जोडत विद्यार्थ्यांमध्ये पर्यावरण संवर्धनाची जाणीव निर्माण करण्याच्या उद्देशाने देवळा येथे ‘शाडू मातीपासून गणेशमूर्ती निर्मिती कार्यशाळे’चे आयोजन करण्यात आले. ‘शाडू मातीची गणेशमूर्ती घडवूया आणि पर्यावरणपूरक गणेशोत्सव साजरा करूया’ या संदेशाने आयोजित कार्यशाळेत तब्बल ७५० विद्यार्थ्यांनी उत्स्फूर्त सहभाग घेतला.
कर्मवीर रामरावजी आहेर महाविद्यालय, जिजामाता कन्या विद्यालय, श्री शिवाजी मराठा इंग्लिश स्कूल, डॉ. डी. एस. आहेर इंग्लिश मीडियम स्कूल, महाराष्ट्र राज्य कलाध्यापक संघ देवळा तालुका आणि रोटरी क्लब ऑफ देवळा टाऊन यांच्या संयुक्त विद्यमाने तसेच देवळा नगरपंचायतीच्या सौजन्याने कार्यशाळेचे आयोजन करण्यात आले.
सुप्रसिद्ध चित्रकार व मूर्तिकार सागर पवार यांनी विद्यार्थ्यांना शाडू मातीपासून गणेशमूर्ती तयार करण्याचे प्रात्यक्षिक व मार्गदर्शन केले. विद्यार्थ्यांनी स्वतःच्या हातांनी गणेशमूर्ती साकारताना मोठा उत्साह दाखविला. यावेळी पर्यावरणपूरक गणेशोत्सव, जलप्रदूषण टाळणे आणि निसर्गाचा समतोल राखण्याबाबतही जनजागृती करण्यात आली.
कार्यक्रमाच्या अध्यक्षस्थानी प्राचार्य डॉ. हितेंद्र आहेर होते. प्रमुख अतिथी म्हणून सागर पवार, डॉ. सौ. मालतीताई आहेर, प्रमोद ढोरजकर, रोटे. दिनकर देवरे आणि प्रा. बापू रौंदळ उपस्थित होते.
यावेळी नगराध्यक्ष भाग्यश्री पवार, उपनगराध्यक्ष संभाजी आहेर, गटशिक्षणाधिकारी सतीश बच्छाव, केंद्रप्रमुख पी. के. आहेर, विविध शाळांचे मुख्याध्यापक, शिक्षक, शिक्षिका, नगरपंचायत पदाधिकारी तसेच शिक्षकेतर कर्मचारी उपस्थित होते.
कार्यशाळेचे प्रास्ताविक एस. टी. पाटील यांनी केले. सूत्रसंचालन एस. एन. आहेर यांनी केले, तर आभार सुनीता पगार यांनी मानले. कार्यक्रमाचे नियोजन डॉ. भारत पवार यांनी केले.
विद्यार्थ्यांच्या हातून साकारलेल्या शाडू मातीच्या गणेशमूर्तींमधून ‘मातीपासून मूर्ती, मूर्तीपासून संस्कार आणि संस्कारातून पर्यावरण संवर्धन’ हा संदेश देण्यात आला. देवळ्यातील हा उपक्रम शैक्षणिक व सामाजिक क्षेत्रासाठी प्रेरणादायी ठरला.
