मनोज जगताप यांची क्लार्क पदावर निवड; अनिकेत माने यांचीही सैन्यात निवड
फलटण | प्रतिनिधी
फलटण तालुक्यात सैन्य भरतीचे हक्काचे केंद्र म्हणून ओळख निर्माण करणाऱ्या जय हिंद करिअर अकॅडमीच्या दोन विद्यार्थ्यांनी भारतीय सैन्यात दिमाखदार यश मिळविले आहे. अकॅडमीचे विद्यार्थी मनोज जगताप यांची भारतीय सैन्यात क्लार्क पदावर निवड झाली असून अनिकेत माने यांनीही आर्मीमध्ये आपले स्थान पक्के केले आहे. त्यांच्या निवडीमुळे झिरपाडी, फलटण परिसरात आनंदाचे वातावरण निर्माण झाले आहे.
जिद्द, मेहनत आणि अकॅडमीच्या शिस्तबद्ध प्रशिक्षणाच्या जोरावर दोन्ही विद्यार्थ्यांनी हे यश मिळविले आहे. विशेष म्हणजे, अत्यंत प्रतिकूल परिस्थितीत काबाडकष्ट करून या विद्यार्थ्यांनी सैन्य भरतीचे स्वप्न पूर्ण केले. गवंडीच्या हाताखाली काम करत असतानाही मेहनत आणि अभ्यास सुरू ठेवून त्यांनी हे यश संपादन केले असल्याने त्यांच्या संघर्षाची विशेष चर्चा होत आहे.
आतापर्यंत २० विद्यार्थ्यांची निवड
जय हिंद करिअर अकॅडमीमध्ये आतापर्यंत सुमारे २० विद्यार्थ्यांची सैन्य भरतीसाठी निवड झाल्याची माहिती देण्यात आली. विद्यार्थ्यांसाठी अकॅडमीमध्ये राहण्याची सुविधा, अभ्यासिका, फिजिकल प्रशिक्षण आणि लेक्चर अशा विविध सुविधा उपलब्ध करून देण्यात आल्या आहेत.
अकॅडमीचे डी. बी. भोसले सर विद्यार्थ्यांच्या प्रशिक्षणासाठी सातत्याने मेहनत घेत असल्याचे सांगण्यात येते. त्यांच्या मार्गदर्शनामुळे जय हिंद करिअर अकॅडमीची ओळख फलटण तालुक्याबरोबरच हळूहळू संपूर्ण महाराष्ट्रात निर्माण होत असल्याचे अकॅडमीच्या वतीने सांगण्यात आले.
मनोज जगताप आणि अनिकेत माने यांच्या यशामुळे परिसरातील युवकांमध्ये सैन्य भरतीची प्रेरणा निर्माण झाली असून, त्यांच्या यशाचे सर्व स्तरांतून अभिनंदन होत आहे.
