लोहा | प्रतिनिधी :
ईद-ए-मिलाद अर्थात पैगंबर हजरत मोहम्मद यांच्या जन्मदिनानिमित्त लोहा शहरात मुस्लिम बांधवांच्या वतीने उत्साहपूर्ण वातावरणात भव्य मिरवणूक काढण्यात आली. जुना लोहा मशीद येथून मिरवणुकीची सुरुवात करण्यात आली. शहरातील प्रमुख मार्गावरून ही मिरवणूक काढण्यात आली.
मिरवणुकीत लोहा शहरातील मुस्लिम बांधवांसह विविध मौलाना मोठ्या संख्येने सहभागी झाले होते. यावेळी आमदार प्रताप पाटील चिखलीकर यांनी ईद-ए-मिलाद व पैगंबर हजरत मोहम्मद यांच्या जन्मदिनानिमित्त मुस्लिम बांधवांना शुभेच्छा दिल्या.
या कार्यक्रमाला लोहा नगरपालिकेचे नगराध्यक्ष शरद पाटील पवार, उपनगराध्यक्ष करीम शेख यांच्यासह नगरसेवक व विविध मान्यवर उपस्थित होते.
विशेष म्हणजे, मिरवणुकीत लोहा शहरातील विविध समाजातील नागरिकांनीही सहभागी होत मुस्लिम बांधवांना ईद-ए-मिलादच्या शुभेच्छा दिल्या. विविध धर्मांच्या नागरिकांनी एकत्र येत सणाचा आनंद साजरा केल्याने सामाजिक सलोखा आणि बंधुभावाचे दर्शन घडले.
भारतामध्ये विविध जाती-धर्मांचे नागरिक एकमेकांच्या सण-उत्सवात सहभागी होत शांतता, एकता आणि बंधुभावाने राहतात, असा सर्वधर्मीय ऐक्याचा संदेश या मिरवणुकीच्या माध्यमातून लोहा शहरातून देण्यात आला. मिरवणुकीदरम्यान उत्साहपूर्ण वातावरण पाहायला मिळाले.
