श्री विठ्ठल, बालाजी, दत्तात्रेय, महाकाल रूपातील मनोहारी शृंगार; दुपारी २ ते ५ जलाभिषेकाची संधी…
लोहा : प्रतिनिधी- हणमंत पांचाळ,
पवित्र श्रावण महिन्यानिमित्त लोहा शहरातील ऐतिहासिक व जागृत श्री नगरेश्वर महादेव मंदिरात विविध धार्मिक कार्यक्रमांचे आयोजन करण्यात आले आहे. दररोजच्या प्रदोष पूजेदरम्यान नगरेश्वर महादेवाला विविध देवतांच्या रूपात सजविण्यात येत असल्याने हे मनोहारी रूप पाहण्यासाठी भाविकांची मोठी गर्दी होत आहे. प्रदोष पूजेवेळी नगरेश्वर महादेवाला विठ्ठल, तिरुपती बालाजी, भगवान दत्तात्रेय, उज्जैनच्या महाकालासह विविध देवतांचे स्वरूप साकारले जात आहे. त्यामुळे श्रावण महिन्यात मंदिर परिसरात भक्तिमय वातावरण निर्माण झाले असून, लोहा शहरासह परिसरातील शिवभक्त मोठ्या संख्येने दर्शनासाठी येत आहेत.
मंदिरात वर्षातील इतर ११ महिने गर्भगृहात पुजाऱ्यांमार्फत पूजा-अर्चा केली जाते. मात्र, श्रावण महिन्यात भाविकांना स्वतःच्या हाताने महादेवाला जलाभिषेक करण्याची विशेष संधी उपलब्ध करून देण्यात आली आहे. सकाळी ६ वाजता नगरेश्वराची नित्यपूजा व मुख्य अभिषेक होतो. त्यानंतर दुपारी २ ते ५ या वेळेत सर्वसामान्य भाविकांसाठी जलाभिषेक व रुद्राभिषेकाची व्यवस्था करण्यात आली आहे. रात्री विष्णुसहस्रनाम पठण, शिवमहापुराण कथा व ‘ॐ नमः शिवाय’ नामजपाचे आयोजन केले जाते.श्रावणातील प्रत्येक सोमवारी नगरेश्वराच्या दर्शनासाठी पहाटेपासूनच भाविकांच्या रांगा लागत आहेत. दर सोमवारी हजारो भाविक दर्शनासाठी येत असल्याने मंदिर प्रशासनाकडून दर्शन व्यवस्था तसेच भाविकांच्या शिस्तीसाठी नियोजन करण्यात आले आहे.
श्री नगरेश्वर मंदिराची स्थापना ६ फेब्रुवारी १९७२ रोजी वैकुंठवासी ह.भ.प. शंकर महाराज कंधारकर यांच्या हस्ते झाली. भगवान शंकराची नियमित पूजा-अर्चा व धार्मिक सेवा उपलब्ध व्हावी, या उद्देशाने मंदिराची स्थापना करण्यात आली. स्थापनेपासून आजतागायत ह.भ.प. वामन महाराज पालमकर यांच्या मार्गदर्शनाखाली येथे नित्यनियमाने पूजा-अर्चा व विविध धार्मिक उपक्रम सुरू आहेत.श्रावण महिन्यासोबतच महाशिवरात्र आणि वै. रंगनाथ महाराज परभणीकर यांच्या पुण्यतिथीनिमित्त मंदिरात अखंड हरिनाम सप्ताहाचे आयोजन केले जाते. त्यामुळे नगरेश्वर मंदिर हे लोहा शहरातील भाविकांसाठी श्रद्धा आणि भक्तीचे महत्त्वाचे केंद्र बनले आहे.
