शहादा येथे बालसंगोपन योजना शिबिर यशस्वी संपन्न.

(रक्षाबंधन निमित्त लाभार्थी महिलांना मोफत शिलाई मशीन भेट: युवकमित्र संस्थेचा उपक्रम)

शहादा,दि.29(का.प्र.)
अनाथ, निराधार बालके, तसेच विधवा, घटस्फोटित व एकल पालक असणाऱ्यांच्या मुलांच्या शिक्षण आणि संगोपनासाठी दरमहा आर्थिक मदत करणाऱ्या ‘क्रांतिज्योती सावित्रीबाई फुले बालसंगोपन योजने’च्या इच्छुक लाभार्थ्यांचे अर्ज संकलन शिबिर शहादा येथे नुकतेच यशस्वीपणे पार पडले.
युवकमित्र परिवार (कोठली) या शासनमान्य संस्थेमार्फत आयोजित या शिबिरात ३५ इच्छुक बालक व पालकांनी सहभाग नोंदवून आपले प्रस्ताव सादर केले. याच कार्यक्रमात रक्षाबंधनाचे औचित्य साधून लाभार्थी महिलांना आर्थिकदृष्ट्या सक्षम करण्यासाठी व स्वयंरोजगार मिळवून देण्यासाठी मोफत शिवणकाम मशीनचे वाटप करण्यात आले.शहरातील महात्मा फुले स्मारक येथे पार पडलेल्या या कार्यक्रमाचे उद्घाटन उपनगराध्यक्ष माधवीताई मकरंद पाटील यांच्या हस्ते झाले, तर कार्यक्रमाच्या अध्यक्षस्थानी ॲड. संगीताताई पाटील उपस्थित होत्या.

यावेळी प्रमुख अतिथी म्हणून पोलीस निरीक्षक हेमंतकुमार पाटील, विस्तार अधिकारी डॉ. योगेश सावळे, ज्येष्ठ कवी अजबसिंग गिरासे, नर्मदा नमकीनचे मालक रमाशंकरभाऊ माळी, समता परिषदेचे जिल्हाध्यक्ष राजेंद्र वाघ, युवा कार्यकर्ते रोहनकुमार माळी, युवकमित्र संस्थेचे संस्थापक प्रवीण महाजन, संचालक मनोज वारुळे, सरस्वती क्लासेसचे कल्पेश राजपूत, आदिवासी आश्रमशाळा व्यवस्थापन समितीचे अध्यक्ष सुनील वळवी आणि भारत पावरा उपस्थित होते. तसेच बालसंगोपन योजनेच्या कार्यकर्त्या संगीता सुनील वळवी आणि पोलीस स्टेशन आवारातील समुपदेशन केंद्राच्या समुपदेशक आरती भूषण शिंदे व अर्चना भरत पावरा यांचीही विशेष उपस्थिती होती.याप्रसंगी उपस्थितांना मार्गदर्शन करताना तालुक्यातील जास्तीत जास्त महिलांनी बालसंगोपन योजनेचा लाभ घ्यावा आणि आपल्या बालकांना उच्चशिक्षित करावे, असे आवाहन मान्यवरांनी केले. कार्यक्रम यशस्वी करण्यासाठी युवकमित्र संस्थेचे स्वयंसेवक गोपाल अजबसिंग गिरासे यांनी विशेष सहकार्य केले.