मानवत प्रतिनिधी
३० ऑगस्टला परभणीत शेतकरी-कार्यकर्ता मेळावा; रखडलेल्या विकासकामांवरही होणार चर्चा
परभणी | प्रतिनिधी : अहमद अन्सारी पाथरी परभणी
उपमुख्यमंत्री तथा शिवसेना नेते ना. एकनाथ शिंदे हे रविवार, ३० ऑगस्ट रोजी परभणीत शेतकरी आणि शिवसेना कार्यकर्त्यांशी थेट संवाद साधणार आहेत. शहरातील इंदिरा गांधी स्टेडियम मैदानावर सकाळी ११ वाजता या संवाद मेळाव्याचे आयोजन करण्यात आले आहे.
या मेळाव्यात उपमुख्यमंत्री एकनाथ शिंदे शेतकऱ्यांच्या विविध प्रश्नांवर संवाद साधण्यासोबतच परभणी जिल्ह्यातील रखडलेल्या विकासकामांबाबतही भूमिका मांडणार आहेत. त्यामुळे या मेळाव्याकडे शेतकरी, कार्यकर्ते आणि नागरिकांचे लक्ष लागले आहे.
पाथरी विधानसभा प्रमुख बालाजी कुऱ्हाडे यांनी या मेळाव्याची माहिती देताना शेतकरी, शिवसेना पदाधिकारी व कार्यकर्त्यांनी मोठ्या संख्येने उपस्थित राहावे, असे आवाहन केले. शेतकऱ्यांचे प्रश्न, जिल्ह्याचा विकास आणि प्रलंबित कामांबाबत थेट संवाद साधण्याची ही महत्त्वाची संधी असल्याचे त्यांनी सांगितले.
खासदार संजय जाधव व विधान परिषद आमदार सईद खान यांच्या मार्गदर्शनाखाली हा संवाद मेळावा होणार आहे. मेळाव्यास मोठ्या संख्येने उपस्थित राहून तो यशस्वी करावा, असे आवाहन बालाजी कुऱ्हाडे यांनी केले आहे.
