कावर्पिंप्री, ता. अमळनेर : शिक्षक दिनानिमित्त सकाळी शाळेत ‘शिक्षिका’ बनून विद्यार्थ्यांना शिकविणाऱ्या दहावीतील विद्यार्थिनीचा त्याच दिवशी दुर्दैवी मृत्यू झाल्याने कावर्पिंप्री गावासह अमळनेर तालुक्यात हळहळ व्यक्त होत आहे. अनुष्का रवींद्र सपकाळे असे मृत विद्यार्थिनीचे नाव आहे.
शिक्षक दिनानिमित्त शाळेत आयोजित कार्यक्रमात अनुष्काने शिक्षिकेची भूमिका साकारत विद्यार्थ्यांना मार्गदर्शन केले. कार्यक्रमानंतर ती घरी परतली. मात्र, दुपारी सुमारे २.३० वाजता तिच्याबाबत दुर्दैवी घटना घडली. कुटुंबीयांनी तिला तातडीने रुग्णालयात दाखल केले. मात्र, वैद्यकीय तपासणीनंतर डॉक्टरांनी तिला मृत घोषित केले.
सकाळी विद्यार्थ्यांसमोर उत्साहाने शिक्षिकेची भूमिका साकारणाऱ्या अनुष्काचा अवघ्या काही तासांत झालेला मृत्यू कुटुंबीय, शिक्षक आणि विद्यार्थ्यांसाठी अत्यंत धक्कादायक ठरला आहे.
दरम्यान, अनुष्काच्या मृत्यूचे नेमके कारण अद्याप स्पष्ट झालेले नाही. घटनेची माहिती मिळाल्यानंतर पोलिसांनी तपास सुरू केला असून, मृत्यूमागील नेमके कारण तपासानंतरच स्पष्ट होणार आहे.
शिक्षक दिन हा शिक्षक-विद्यार्थी नात्याचा सन्मान करण्याचा आणि आनंदाचा दिवस. मात्र, कावर्पिंप्री येथे याच दिवशी घडलेल्या या दुर्दैवी घटनेने एका कुटुंबावर दुःखाचा डोंगर कोसळला असून, गावात शोककळा पसरली आहे.
