कन्नड : मराठा आरक्षणाच्या मागणीसाठी सकल मराठा समाजाच्या वतीने वाकद फाटा-जामडी जहागीर चौफुली येथे जोरदार रास्ता रोको आंदोलन करण्यात आले. या आंदोलनाला परिसरातील विविध गावांमधून सकल मराठा समाज बांधवांनी मोठ्या संख्येने उपस्थित राहून पाठिंबा दिला.
आंदोलनादरम्यान मराठा आरक्षणाच्या मागणीसह समाजाच्या विविध प्रश्नांकडे शासनाचे लक्ष वेधण्यात आले. यावेळी मुलींच्या हस्ते मंडळ अधिकारी तसेच पोलीस प्रशासनाला निवेदन देण्यात आले.
आंदोलनाच्या पार्श्वभूमीवर पिशोर पोलिसांकडून चोख पोलीस बंदोबस्त ठेवण्यात आला होता. आंदोलकांनी शांततेच्या मार्गाने आपला रोष व्यक्त करत शासनाने मराठा समाजाच्या मागण्यांचा गांभीर्याने विचार करावा, अशी मागणी केली.
या रास्ता रोको आंदोलनासाठी चिंचोली लिंबाजी, वाकी, नेवपूर, घाटशेंद्रा, टाकळी अंतुर, लोहेगाव, गणेशपूर, बरकतपूर, रायगाव, वाकोद, जामडी जहागीर, दहेगाव, शेलगाव आणि दिगाव खेड़ी या गावांतील सकल मराठा समाज बांधव मोठ्या संख्येने उपस्थित होते.
आंदोलनामुळे काही काळ वाहतुकीवर परिणाम झाला. मात्र पोलिसांच्या नियोजनामुळे परिस्थिती नियंत्रणात राहिली..
