आत्महत्या हा पर्याय नाही; संवादातून संकटावर मात करा

जागतिक आत्महत्या प्रतिबंधक दिनानिमित्त विद्यापीठात रॅली, पथनाट्याद्वारे जनजागृती

छत्रपती संभाजीनगर | प्रतिनिधी

जागतिक आत्महत्या प्रतिबंधक दिनानिमित्त गुरुवारी (१० सप्टेंबर) डॉ. बाबासाहेब आंबेडकर मराठवाडा विद्यापीठातील मानसशास्त्र विभागाच्या वतीने आत्महत्या प्रतिबंध आणि मानसिक आरोग्याबाबत जनजागृतीपर विविध उपक्रम घेण्यात आले. यामध्ये मानसशास्त्र विभागासह विद्यापीठातील इतर विभागांचे प्राध्यापक आणि विद्यार्थ्यांनी मोठ्या संख्येने सहभाग घेतला.

अनेकदा परिस्थिती हाताबाहेर गेल्याची भावना निर्माण झाल्यानंतर विद्यार्थी किंवा तरुणांच्या मनात आत्महत्येचे विचार येऊ शकतात. काही जण त्या विचारातून आत्महत्येचा प्रयत्नही करतात. अशा वेळी व्यक्तीच्या मनातील भावना समजून घेणे, तिच्याशी संवाद साधणे आणि योग्य वेळी मदतीचा हात देणे अत्यंत महत्त्वाचे आहे. याच संदेशातून विद्यार्थ्यांमध्ये आणि समाजामध्ये जनजागृती करण्यात आली.

‘आत्महत्या हा शेवटचा पर्याय नाही’ हा संदेश देत एम.ए. मानसशास्त्राच्या विद्यार्थ्यांनी विद्यापीठ परिसरात पथनाट्य सादर केले. तसेच रॅलीच्या माध्यमातून मानसिक आरोग्य, आत्महत्या प्रतिबंध आणि गरजू व्यक्तींना वेळेवर मदत मिळण्याबाबत जनजागृती करण्यात आली.

आयुष्यामध्ये आलेल्या अडचणी कितीही मोठ्या वाटल्या तरी त्या कायमस्वरूपी नसतात. आई-वडील, कुटुंबीय, मित्र आणि आपल्या आयुष्यातील नाती यांचे महत्त्व समजून घेणे गरजेचे आहे. त्यामुळे अडचणींच्या काळात स्वतःला एकटे न ठेवता जवळच्या व्यक्तीशी बोलणे आणि आवश्यक असल्यास मानसशास्त्रज्ञांची मदत घेणे हा योग्य मार्ग असल्याचा संदेश यावेळी देण्यात आला.

विद्यापीठातील मानसशास्त्र विभागातील विभाग प्रमुख अपर्णा अष्टपुत्रे मॅडम व प्राध्यापक आणि विद्यार्थी मानसिक अडचणींना सामोरे जाणाऱ्या विद्यार्थ्यांच्या मदतीसाठी सदैव तत्पर राहतील, अशी ग्वाहीही यावेळी देण्यात आली.

— अविनाश शिपे
छत्रपती संभाजीनगर | प्रतिनिधी