मारेगाव पोलिस निरीक्षक सागर दानडे यांचे गणेशोत्सव मंडळांना आवाहन; नियमांचे पालन करून उत्सव साजरा करण्याचे आवाहन
मारेगाव : मारेगाव तालुक्यात यंदा विविध ठिकाणी मोठ्या उत्साहात गणेशोत्सव साजरा होत असून, तालुक्यात ३० हून अधिक गणेशोत्सव मंडळे असल्याची माहिती आहे. गणेशोत्सवाच्या पार्श्वभूमीवर डीजेमुळे होणाऱ्या ध्वनीप्रदूषणाला आळा घालण्यासाठी मारेगाव पोलिस निरीक्षक सागर दानडे यांनी गणेशोत्सव मंडळांना पारंपरिक पद्धतीने आणि नियमांचे पालन करून उत्सव साजरा करण्याचे आवाहन केले आहे.
गणेशोत्सवादरम्यान मोठ्या आवाजात डीजे वाजवल्याने ध्वनीप्रदूषणाचा त्रास होऊ शकतो. विशेषतः लहान मुले, ज्येष्ठ नागरिक तसेच हृदयविकारासारख्या आरोग्यविषयक समस्या असलेल्या व्यक्तींना मोठ्या आवाजाचा त्रास होण्याची शक्यता असल्याने मंडळांनी याबाबत काळजी घ्यावी, असे पोलिस निरीक्षक दानडे यांनी सांगितले.
गणेशोत्सव मंडळांनी डीजेवर मोठा खर्च करण्याऐवजी सांस्कृतिक, सामाजिक आणि पारंपरिक कार्यक्रमांचे आयोजन करावे. यामध्ये महिला, मुली तसेच ज्येष्ठ आणि प्रतिष्ठित नागरिकांचा सन्मान करून समाजोपयोगी उपक्रमांना प्राधान्य द्यावे, असे आवाहन त्यांनी केले.
गणेशोत्सव हा श्रद्धा, सामाजिक एकोपा आणि सांस्कृतिक परंपरा जपणारा उत्सव असल्याने त्याचे पावित्र्य आणि उत्साह कायम ठेवत इतर नागरिकांना कोणताही त्रास होणार नाही, याची मंडळांनी दक्षता घ्यावी. पोलिस प्रशासनाला सहकार्य करून शासनाने व प्रशासनाने घालून दिलेल्या नियमांचे पालन करावे, असेही पोलिस निरीक्षक सागर दानडे यांनी स्पष्ट केले.
“डीजेवर खर्च करण्यापेक्षा विविध सामाजिक व सांस्कृतिक उपक्रमांचे आयोजन करून गणेशोत्सवाची वेगळी ओळख निर्माण करावी. पोलिस प्रशासनाला सहकार्य करावे आणि इतर नागरिकांना त्रास होणार नाही, अशा पद्धतीने उत्सव उत्साहात साजरा करावा,” असे आवाहन पोलिस निरीक्षक सागर दानडे यांनी केले.
ध्वनीप्रदूषणाचा प्रश्न केवळ मारेगाव तालुक्यापुरता मर्यादित नसून, विविध ठिकाणी गणेशोत्सव मंडळांकडून पारंपरिक आणि पर्यावरणपूरक पद्धतीने उत्सव साजरा करण्यावर भर दिला जात असल्याचेही त्यांनी सांगितले.
