महापालिकेच्या आर दक्षिण विभागाकडून युद्धपातळीवर दुरुस्तीचे काम सुरू; पाणी बचतीच्या काळात नागरिकांची चिंता
मुंबई कांदिवली :प्रतिनिधी
कांदिवली पश्चिम येथील लालजी पाडा परिसरात शनिवारी, २६ सप्टेंबर २०२६ रोजी सकाळच्या सुमारास पाणीपुरवठा करणारी पाइपलाइन फुटल्याने मोठ्या प्रमाणात पाणी रस्त्यावर वाहून गेले. लालजी पाडा पोलीस ठाण्याजवळील महादेव मंदिरासमोरील लिंक रोड परिसरात ही घटना घडली.
पाइपलाइन फुटल्याने लाखो लिटर पाणी वाया जात असल्याचे दिसून आले. सध्या मुंबईत कमी पावसामुळे महापालिकेने १० टक्के पाणीकपात लागू केली असताना अशा प्रकारे पाणी वाया जाणे ही चिंतेची बाब असल्याचे नागरिकांकडून सांगण्यात येत आहे.
दरम्यान, फुटलेल्या पाइपलाइनच्या दुरुस्तीचे काम मुंबई महापालिकेच्या पाणीपुरवठा विभाग, आर दक्षिण विभागाकडून युद्धपातळीवर सुरू करण्यात आले आहे. दुरुस्तीचे काम लवकरच पूर्ण होईल, अशी माहिती संबंधित कर्मचाऱ्यांनी दिली.
