आरोग्य विभागाच्या विविध उपक्रमांचा घेतला आढावा; HPV लसीकरण वाढविण्याच्या सूचना
कजगाव : जळगाव जिल्हा परिषदेच्या मुख्य कार्यकारी अधिकारी करिष्मा नायर यांनी आज सायंकाळी ५.३० वाजता प्राथमिक आरोग्य केंद्र, कजगाव येथे अचानक भेट देऊन पाहणी केली. यावेळी त्यांनी आरोग्य केंद्रातील विविध कामकाजाचा आढावा घेत वैद्यकीय अधिकारी व कर्मचाऱ्यांकडून सुरू असलेल्या उपक्रमांची माहिती घेतली.
भेटीदरम्यान NQAS, सेवा संकल्प अभियान, ‘श्री गणेशा आरोग्याचा अभियान’, प्रसूती सेवा, लसीकरण, कीटकजन्य व जलजन्य आजारांचे नियंत्रण, HPV लसीकरण, आयुष्मान कार्ड, गोल्डन कार्ड आणि आभा कार्ड आदी उपक्रमांचा आढावा घेण्यात आला. आरोग्य केंद्रातील कामकाज समाधानकारक असल्याचे नमूद करत त्यांनी विविध उपक्रमांमध्ये अधिक प्रभावीपणे काम करण्याच्या सूचना दिल्या.
विशेषतः HPV लसीकरणाचे उद्दिष्ट अधिक व्यापक करण्यासाठी लसीकरणाचे काम वाढवावे, अशा सूचना करिष्मा नायर यांनी दिल्या. तसेच आरोग्य केंद्रातील अंतर्गत व बाह्य स्वच्छतेबाबत त्यांनी समाधान व्यक्त केले.
यावेळी वैद्यकीय अधिकारी डॉ. प्रियंका पाटील, आरोग्य निरीक्षक श्रीकांत मराठे, अजित राजगुडे, औषध निर्माण अधिकारी उमेश महाजन, वैज्ञानिक प्रयोगशाळा अधिकारी सौरभ अहिरे, आरोग्य सेविका उज्वला परदेशी, नलिनी परदेशी, बेबा पराडडे, लक्ष्मी तलांडे, परिचर गुणवंत मोरे आदी उपस्थित होते.
