शासकीय योजनांचा पात्र लाभार्थ्यांना थेट लाभ; प्रमाणपत्रांचे वितरण आणि विविध विभागांकडून मार्गदर्शन
शहादा, दि. ३० (प्रतिनिधी) : शासनाच्या विविध योजना व शासकीय सेवा पात्र लाभार्थ्यांपर्यंत थेट पोहोचविण्याच्या उद्देशाने सेवा संकल्प अभियानांतर्गत खेडदिगर मंडळ भागात विशेष शिबिराचे आयोजन करण्यात आले. या शिबिराला नागरिकांचा उत्स्फूर्त प्रतिसाद मिळाला.
शहादा तालुक्याचे प्रशासकीय प्रमुख तथा तहसीलदार संभाजी पाटील यांच्या हस्ते दीपप्रज्वलन करून शिबिराचे उद्घाटन करण्यात आले. यावेळी उपस्थित मान्यवरांचा सत्कार करण्यात आला. तसेच विविध शासकीय योजनांच्या पात्र लाभार्थ्यांना लाभाचे वाटप करण्यात आले असून विविध प्रमाणपत्रांचेही वितरण करण्यात आले.
तहसीलदार संभाजी पाटील यांनी ‘जिवंत सातबारा’ मोहिमेबाबत माहिती देताना या मोहिमेला मोठ्या प्रमाणात यश मिळाले असून नागरिकांना त्याचा प्रत्यक्ष लाभ झाल्याचे सांगितले. नागरिकांनी आपल्या जमिनीशी संबंधित नोंदी व कागदपत्रे अद्ययावत ठेवावीत तसेच शासनाच्या विविध योजनांचा लाभ घेण्यासाठी पुढाकार घ्यावा, असे आवाहन त्यांनी केले.
सरपंच गणेश बागुल यांनी नागरिकांनी शासनाच्या विविध योजनांचा लाभ घेण्यासाठी स्वतः पुढाकार घ्यावा आणि आवश्यक कागदपत्रे अद्ययावत ठेवून पात्रतेनुसार योजनांचा लाभ घ्यावा, असे आवाहन केले.
पुरवठा विभागाच्या वतीने रेशनकार्डधारक व पात्र लाभार्थ्यांना विविध शासकीय योजनांची माहिती देण्यात आली. योजनांचा लाभ मिळवून घेण्यासाठी आवश्यक मार्गदर्शनही करण्यात आले. या उपक्रमासाठी परिसरातील रेशन दुकानदार तथा स्वस्त धान्य दुकानदारांनी सहकार्य केले. लाभार्थ्यांपर्यंत योजनांची माहिती पोहोचविणे आणि त्यांना लाभ मिळवून देण्यासाठी प्रयत्न केल्याबद्दल उपस्थित मान्यवरांनी स्वस्त धान्य दुकानदारांचे कौतुक केले.
शिबिरास सरपंच गणेश बागुल, सरपंच नवनाथ वाघ, सामाजिक कार्यकर्त्या मंजुळाताई मुसळदे, सामाजिक कार्यकर्ते युवराजभाऊ, मंडळ अधिकारी ब्राह्मणपुरी, ग्रामसेवक अरुण गवळी तसेच ब्राह्मणपुरी मंडळातील ग्राम महसूल अधिकारी व कोतवाल उपस्थित होते. यावेळी नागरिकांच्या महसूल व पुरवठा विभागाशी संबंधित विविध अडचणी जाणून घेऊन त्यावर मार्गदर्शन करण्यात आले.
पात्र लाभार्थ्यांना विविध योजनांचा लाभ व प्रमाणपत्रे उपलब्ध करून देण्यात आल्याने नागरिकांमध्ये समाधानाचे वातावरण होते. कार्यक्रमाचे संपूर्ण नियोजन श्री. शिरीषचंद्र परदेशी व त्यांच्या टीमने केले. सूत्रसंचालन व आभार प्रदर्शन श्री. लक्ष्मण कोळी यांनी केले. कार्यक्रमाच्या यशस्वी आयोजनासाठी सामाजिक कार्यकर्ते श्री. सुभाष माळी, श्री. राजू शिंदे व देवा भाऊ यांनी सहकार्य केले.
सेवा संकल्प अभियानाच्या माध्यमातून महसूल, पुरवठा तसेच इतर विभागांच्या विविध योजना व सेवा नागरिकांपर्यंत थेट पोहोचविण्याचा प्रशासनाचा प्रयत्न असून, अशा शिबिरांमुळे नागरिकांना एकाच ठिकाणी माहिती, मार्गदर्शन आणि पात्रतेनुसार प्रत्यक्ष लाभ मिळण्यास मदत होत आहे.
