ब्रिक्स वुमन भ्रष्टाचार निर्मूलन समितीच्या पाठिंब्यानंतर आमरण उपोषण अखेर स्थगित
येवला, दि. १ (प्रतिनिधी) : येवला तालुक्यातील बाभुळगाव खुर्द ग्रामपंचायत हद्दीतील बंद करण्यात आलेला सार्वजनिक वहिवाट रस्ता तात्काळ मोकळा करण्याच्या मागणीसाठी सुरू असलेले आमरण उपोषण प्रशासनाच्या लेखी आश्वासनानंतर अखेर स्थगित करण्यात आले. या आंदोलनाला ब्रिक्स वुमन भ्रष्टाचार निर्मूलन समितीने खंबीर पाठिंबा दिल्यानंतर प्रशासनाने संबंधित रस्ता अतिक्रमणातून मोकळा करण्याबाबत आवश्यक कार्यवाही करण्याचे आश्वासन दिले.
सार्वजनिक वहिवाट रस्ता बंद झाल्यामुळे शेतकरी, शाळकरी विद्यार्थी, महिला तसेच ग्रामस्थांना मोठ्या अडचणींचा सामना करावा लागत होता. या समस्येविरोधात सरला अरुण भूरक या पंचायत समिती, येवला येथे आमरण उपोषणाला बसल्या होत्या. गेल्या तीन दिवसांपासून हे आंदोलन सुरू होते.
आंदोलनाची माहिती मिळताच ब्रिक्स वुमन भ्रष्टाचार निर्मूलन समितीच्या पदाधिकाऱ्यांनी उपोषणस्थळी भेट देऊन आंदोलनाला जाहीर पाठिंबा दिला. यावेळी समितीचे उत्तर महाराष्ट्र विभागीय अध्यक्ष योगेश ननवरे यांनी बाभुळगाव खुर्द येथे कार्यरत ग्रामविकास अधिकारी प्रवीण पठारे यांच्याशी भ्रमणध्वनीद्वारे संपर्क साधून उपोषणकर्त्यांच्या मागण्यांवर तातडीने कार्यवाही करण्याची सूचना केली.
यानंतर ग्रामविकास अधिकाऱ्यांनी उपोषणकर्त्यांशी चर्चा केली. पारंपरिक वहिवाटीचा तसेच सार्वजनिक रस्ता अतिक्रमणातून मोकळा करण्याबाबत आवश्यक ती कार्यवाही करण्यात येईल, असे प्रशासनाच्या वतीने आश्वासन देण्यात आले. प्रशासनाकडून मिळालेल्या आश्वासनानंतर उपोषण स्थगित करण्यात आले असून, उपोषणकर्त्यांनी समाधान व्यक्त केले.
यावेळी समितीचे राष्ट्रीय समन्वयक हितेश दाभाडे, प्रदेश महिला कार्याध्यक्ष निर्मला बुल्हे, उत्तर महाराष्ट्र विभागीय अध्यक्ष योगेश ननवरे, उत्तर महाराष्ट्र विभागीय महिला अध्यक्ष पूजा पटेल, नाशिक संपर्कप्रमुख संजय गवारे यांच्यासह ग्रामस्थ उपस्थित होते.
गेल्या तीन दिवसांपासून सुरू असलेल्या आंदोलनाला समितीच्या पाठिंब्यामुळे प्रशासनाकडून आश्वासन मिळाल्याने ग्रामस्थांनी समितीच्या पदाधिकाऱ्यांचे आभार मानले.
