मसाज सेंटरच्या आडून अनैतिक व्यवसाय सुरू असल्याचा संशय; दोन महिलांसह तिघांना अटक, एक आरोपी फरार
कळंबोली : प्रतिनिधी
नवीन पनवेल येथील पूजा कॉम्प्लेक्समधील ‘हेवन थाई स्पा’मध्ये मसाज सेंटरच्या नावाखाली अनैतिक व्यवसाय सुरू असल्याची माहिती मिळाल्यानंतर नवी मुंबई पोलिसांच्या मानवी तस्करीविरोधी पथकाने छापा टाकून कारवाई केली. बनावट ग्राहकाच्या माध्यमातून माहितीची खातरजमा केल्यानंतर ही कारवाई करण्यात आली.
या कारवाईत मिझोराम आणि मणिपूर राज्यातील पाच महिलांची सुटका करण्यात आली. त्यांना सुरक्षित ताब्यात घेण्यात आले असून, या महिलांना या व्यवसायात आणण्यामागे कोणाचा सहभाग आहे, याचा तपास पोलीस करीत आहेत.
वरिष्ठ पोलीस निरीक्षक गजानन कदम यांच्या मार्गदर्शनाखाली पोलिसांच्या पथकाने ही कारवाई केली. कारवाईदरम्यान दोन महिला आणि एका पुरुषाला अटक करण्यात आली असून, आणखी एका आरोपीचा शोध सुरू आहे.
याप्रकरणी खांदेश्वर पोलीस ठाण्यात अनैतिक व्यापार प्रतिबंधक कायद्यानुसार गुन्हा दाखल करण्यात आला आहे. अटक करण्यात आलेल्या आरोपींची चौकशी सुरू असून, या प्रकरणातील इतर संभाव्य व्यक्ती तसेच महिलांना या व्यवसायात आणण्यामागील यंत्रणेचा शोध घेण्यात येत आहे.
स्पाच्या नावाखाली सुरू असलेल्या या कथित प्रकारामुळे परिसरात खळबळ उडाली आहे. प्रकरणाचा पुढील तपास खांदेश्वर पोलीस करीत आहेत.
