अभिजीत चव्हाण, मोहन बोरा यांची सदस्यपदी निवड
जालना : प्रतिनिधी : जालना येथील साई काणे क्रिकेट अकॅडमीचे संचालक राजू काणे यांची महाराष्ट्र क्रिकेट संघटनेच्या (MCA) टुर्नामेंट कमिटीच्या चेअरमनपदी पुन्हा निवड झाली आहे. तसेच छत्रपती संभाजीनगरचे माजी वेगवान गोलंदाज मोहन बोरा आणि जालना येथील अभिजीत चव्हाण यांची टुर्नामेंट कमिटीच्या सदस्यपदी निवड करण्यात आली आहे. महाराष्ट्र क्रिकेट संघटनेच्या सीएसी कमिटीचे चेअरमन सचिन मुळे यांनी बुधवारी ही माहिती दिली.
गत हंगामातही महाराष्ट्र क्रिकेट संघटनेतर्फे राजू काणे यांची टुर्नामेंट कमिटीच्या चेअरमनपदी नियुक्ती करण्यात आली होती. त्यावेळी मोहन बोरा आणि अभिजीत चव्हाण यांचाही समितीत समावेश करण्यात आला होता. गत हंगामात विविध वयोगटांतील क्रिकेट स्पर्धांचे यशस्वी आयोजन केल्यामुळे या तिघांवर पुन्हा विश्वास दाखवण्यात आला आहे.
मोहन बोरा हे जिल्हा क्रिकेट संघटनेचे आजीव सभासद आहेत. राजू काणे यांनी महाराष्ट्र क्रिकेट संघटनेमध्ये निवड समिती सदस्य, प्रशिक्षक तसेच संघ व्यवस्थापक म्हणून विविध जबाबदाऱ्या पार पाडल्या आहेत.
क्रिकेट क्षेत्रात राजू काणे यांनी अनेक प्रतिभावान खेळाडूंना घडविण्यात योगदान दिले आहे. भारताच्या अंडर-१९ विश्वचषक संघाचे कर्णधारपद भूषविणारे विजय झोल यांच्यासह अनेक खेळाडूंना प्रशिक्षण व मार्गदर्शन देण्यात त्यांचा सहभाग राहिला आहे.
राजू काणे, मोहन बोरा आणि अभिजीत चव्हाण यांच्या निवडीमुळे जालना तसेच छत्रपती संभाजीनगरच्या क्रिकेट क्षेत्रातून समाधान व्यक्त होत असून, त्यांचे विविध स्तरांतून अभिनंदन करण्यात येत आहे.
