कुणबी परिषदेच्या अहवालाचे अनावरण; ‘गाव तिथे शाखा’ उपक्रम राबविण्याचा निर्धार
खेड, दि. १ (प्रतिनिधी) : कुणबी समाजोन्नती संघ मुंबई, शाखा खेड (ग्रामीण), कुणबी युवा व कुणबी महिला खेड यांच्या संयुक्त विद्यमाने कुणबी समाजोन्नती संघाच्या १०६ व्या वर्धापन दिनानिमित्त तसेच माजी आमदार व शिक्षणमहर्षी स्व. तु. बा. कदम यांच्या १६ व्या स्मृतिदिनानिमित्त पुरस्कार गौरव सोहळ्याचे आयोजन करण्यात आले. पिरलोटे येथील ह.भ.प. श्री. सरखाराम महाराज गोवळकर यांच्या संतकृपा संकुलातील बँक्वेट हॉलमध्ये गुरुवार, दि. १ ऑक्टोबर २०२६ रोजी हा कार्यक्रम उत्साहात पार पडला.
कार्यक्रमास जिल्हा परिषद रत्नागिरीच्या अध्यक्षा अस्मिताताई केंद्रे, कुणबी समाजोन्नती संघ मुंबई शाखा खेडचे अध्यक्ष शंकर बाईत, खेड ग्रामीणचे अध्यक्ष कृष्णा आग्रे, कुणबी युवा अध्यक्ष सुरज जोगळे, जिल्हा परिषद सदस्य सचिन धाडवे, जिल्हा परिषद सदस्य मानसी जगदाळे, ग्रामीण महिला खजिनदार साक्षी म्हादे, जिजाऊ शैक्षणिक व सामाजिक संस्थेचे मार्गदर्शक अमर राऊत यांच्यासह समाजातील पदाधिकारी, कार्यकर्ते व सदस्य मोठ्या संख्येने उपस्थित होते.
कुणबी समाजाच्या जडणघडणीत तसेच समाजाच्या प्रगतीसाठी विविध क्षेत्रांत उल्लेखनीय योगदान देणाऱ्या मान्यवरांचा यावेळी गौरव करण्यात आला. सामाजिक क्षेत्रातील योगदानाबद्दल बाबाजी झुजम (कुरवल, खेड) यांना समाजभूषण पुरस्कार प्रदान करण्यात आला.
याशिवाय कृषी क्षेत्रासाठी विजय घाणेकर (चिंचघर), वैद्यकीय क्षेत्रासाठी सागर जोगळे (भडगाव), उद्योग क्षेत्रासाठी अनिल काटकर (सुकदर) व प्रेरणादायी कार्यासाठी अंकिता शिगवण (शेरवल), शिक्षण क्षेत्रासाठी राजेश भागणे (तळघर) व प्रेरणादायी कार्यासाठी रसिका रेवाळे/खांडेकर, कला व सांस्कृतिक क्षेत्रासाठी योगेश मुकनाक (तिसे) व प्रेरणादायी कार्यासाठी सूर्यकांत धाडवे (कळंबणी बु.), राजकीय क्षेत्रासाठी सचिन धाडवे (सुकीवली) व प्रेरणादायी कार्यासाठी प्रशांत चव्हाण (भरणे), क्रीडा क्षेत्रासाठी सुप्रिया थोरे, आध्यात्मिक क्षेत्रासाठी राजाराम घाणेकर व सखाराम गोवळकर, प्रशासकीय क्षेत्रासाठी विजय बाईत तसेच अंधश्रद्धा निर्मूलन व सामाजिक प्रबोधन क्षेत्रासाठी संदीप गोवळकर यांचा सन्मान करण्यात आला.
यावेळी मार्गदर्शन करताना अस्मिताताई केंद्रे यांनी कुणबी समाजाच्या सर्वांगीण विकासासाठी खेड येथे भव्य कुणबी भवन उभारण्याची गरज व्यक्त केली. समाजाच्या प्रगतीमध्ये महिलांची भूमिका महत्त्वाची असून महिला सक्षम झाल्यास कुटुंब आणि समाज अधिक सक्षम होईल, असे त्यांनी नमूद केले.
दरम्यान, दि. ७ जुलै २०२६ रोजी झालेल्या कुणबी परिषदेतील ठरावांच्या अनुषंगाने तयार करण्यात आलेल्या अहवालाचे उपस्थित मान्यवरांच्या हस्ते अनावरण करण्यात आले. परिषदेत घेतलेल्या निर्णयांची अंमलबजावणी तालुक्यातील प्रत्येक गाव आणि कुटुंबापर्यंत पोहोचविण्यासाठी ‘गाव तिथे शाखा’ उपक्रम राबविण्याचा निर्धार यावेळी करण्यात आला.
कार्यक्रमाचे प्रास्ताविक सचिन गोवळकर यांनी केले, तर सूत्रसंचालन बाळू सनगरे यांनी केले. कार्यक्रमास समाजबांधवांची उत्स्फूर्त उपस्थिती लाभली.
