माऊली अगरबत्ती इंडस्ट्रीजच्या रोजगार मेळाव्यात महिलांना आत्मनिर्भरतेचा संदेश
चिखली : माऊली अगरबत्ती इंडस्ट्रीजच्या वतीने आयोजित भव्य रोजगार मेळावा उत्साहात पार पडला. या मेळाव्यात महिलांना रोजगाराच्या संधी उपलब्ध करून देतानाच स्वतःचा व्यवसाय सुरू करून आर्थिकदृष्ट्या स्वावलंबी होण्याचे आवाहन करण्यात आले.
कार्यक्रमाच्या अध्यक्षस्थानी निंबाळकर अगरबत्ती इंडस्ट्रीज, नागपूरचे संचालक पिंटू पाटील निंबाळकर होते. प्रमुख पाहुणे म्हणून भाजप महिला मोर्चाच्या जिल्हा उपाध्यक्षा निताताई जैन, जैन संघटनेचे जिल्हाध्यक्ष भास्करजी डुकरे, रामकृष्ण जाधव, स्वातीताई साबळे, सूर्यकांत मेहत्रे तसेच शेतकरी संघटनेचे सुधाकर तायडे उपस्थित होते.
कार्यक्रमाचे प्रास्ताविक माऊली अगरबत्ती समूहाच्या व्यवस्थापकीय संचालिका वर्षा शंकरजी जंजाळ यांनी केले. महिलांना मार्गदर्शन करताना त्यांनी “रोजगार मागणारे नाही, तर रोजगार देणारे बना. स्वतःचा व्यवसाय सुरू करून स्वावलंबी व्हा,” असे आवाहन केले.
यावेळी उपस्थित मान्यवरांनी महिलांनी पारंपरिक रोजगाराच्या संधींसोबतच उद्योग-व्यवसायाकडे वळण्याची गरज व्यक्त केली. स्वतःचा व्यवसाय उभारून इतरांनाही रोजगाराच्या संधी उपलब्ध करून देण्याचा संदेश या मेळाव्यातून देण्यात आला.
कार्यक्रमाचे मुख्य आयोजक शंकरजी जंजाळ होते. कार्यक्रम यशस्वी करण्यासाठी सीमा वाघमारे, योगिता जाधव, शीला भिलारी, सविता जाधव, सपना सरजसे यांच्यासह कार्यकर्त्यांनी परिश्रम घेतले.
