अपुरा पाऊस व काटेपूर्णा धरणातील घटता पाणीसाठा; नागरिकांनी पाण्याची बचत करण्याचे आवाहन
अकोला शहर प्रतिनिधी
अकोला : अकोला शहरातील पाणीपुरवठ्याचे वेळापत्रक बदलण्यात आले असून, दि. ४ ऑक्टोबर २०२६ पासून सात दिवसांआड आठव्या दिवशी होणारा पाणीपुरवठा आता १० दिवसांआड ११व्या दिवशी करण्यात येणार आहे.
अकोला महानगरपालिकेच्या पाणीपुरवठा योजनेचा मुख्य जलस्रोत काटेपूर्णा प्रकल्प असून, दि. १ ऑक्टोबर रोजी धरणातील उपयुक्त जलसाठा १६.२९ दलघमी म्हणजेच १८.८७ टक्के इतका आहे. अपुऱ्या पावसामुळे पाण्याची मागणी वाढत असताना धरणातील पाणीसाठ्यात सातत्याने घट होत असल्याने हा निर्णय घेण्यात आला आहे.
या बदलानुसार शहराच्या मूळ हद्दीसह हद्दवाढ भागातील विविध जलकुंभांवरून होणारा पाणीपुरवठा १० दिवसांआड ११व्या दिवशी करण्यात येणार आहे. तसेच २५ एमएलडी जलशुद्धीकरण केंद्रावरून होणाऱ्या पाणीपुरवठ्यालाही हे वेळापत्रक लागू राहणार आहे.
अकोला शहरातील नागरिकांनी पाण्याची पुरेशी साठवणूक करून पाण्याचा अपव्यय टाळावा, तसेच बदललेल्या पाणीपुरवठा वेळापत्रकाची नोंद घेऊन महानगरपालिका प्रशासनास सहकार्य करावे, असे आवाहन कार्यकारी अभियंता, पाणीपुरवठा विभाग, अकोला महानगरपालिका यांच्या वतीने करण्यात आले आहे.
