सेलू | प्रतिनिधी: सेलू तालुक्यातील बोरी गावात नाल्या तुंबल्याने परिसरात अस्वच्छता निर्माण झाली असून, नागरिकांच्या आरोग्याचा प्रश्न गंभीर बनला आहे. ग्रामपंचायतीकडून नियमित स्वच्छता केली जात नसल्याचा आरोप करत अखेर महिलांनीच पुढाकार घेत नाल्यांची साफसफाई सुरू केली.
गावातील विविध भागांतील नाल्यांमध्ये कचरा व घाण साचल्याने सांडपाणी रस्त्यावर येत आहे. त्यामुळे परिसरात दुर्गंधी पसरली असून नागरिकांना त्रास सहन करावा लागत आहे. ग्रामपंचायतीकडे वारंवार तक्रारी करूनही अपेक्षित स्वच्छता होत नसल्याचे नागरिकांचे म्हणणे आहे.
दरम्यान, महिलांनी स्वतः पुढाकार घेत नाल्यांमधील कचरा बाहेर काढून परिसर स्वच्छ केला. स्वच्छतेसाठी ग्रामपंचायतीकडून निधी व कर आकारणी होत असताना नागरिकांनाच स्वच्छतेची कामे करावी लागत असल्याने ग्रामस्थांमध्ये नाराजी व्यक्त होत आहे.
रोगराई पसरण्यापूर्वी प्रशासन जागे होणार का? असा सवाल ग्रामस्थांनी उपस्थित केला असून, ग्रामपंचायत प्रशासनाने तातडीने गावातील नाल्यांची साफसफाई करून नियमित स्वच्छता व्यवस्था सुरू करावी, अशी मागणी नागरिकांकडून करण्यात येत आहे.
