परभणी : महाराष्ट्राच्या साहित्य आणि सामाजिक चळवळीच्या क्षेत्रात महत्त्वाचे योगदान देणाऱ्या राज्यस्तरीय अण्णा भाऊ साठे विचार साहित्य संमेलनाच्या अध्यक्षपदी राष्ट्रपती पुरस्कारप्राप्त शिक्षक तथा प्रसिद्ध साहित्यिक शिवा कांबळे सर यांची निवड करण्यात आली आहे.
मागील २२ वर्षांपासून लाल सेनेच्या वतीने महाराष्ट्रात अण्णा भाऊ साठे यांच्या विचारांना, साहित्याला आणि सामाजिक परिवर्तनाच्या चळवळीला समर्पित राज्यस्तरीय साहित्य संमेलनाचे आयोजन करण्यात येत आहे. यंदाचे हे संमेलन २३वे वर्ष असून, आगामी नोव्हेंबर महिन्यात संमेलनाचे आयोजन करण्यात येणार आहे.
या संमेलनाच्या नियोजनाच्या अनुषंगाने परभणी येथे आज महत्त्वपूर्ण बैठक संपन्न झाली. यावेळी संमेलनाच्या अध्यक्षपदासाठी शिवा कांबळे सर यांच्या नावाची घोषणा करण्यात आली. त्यांच्या निवडीमुळे अण्णा भाऊ साठे यांच्या साहित्यिक व सामाजिक विचारांना व्यापक व्यासपीठ मिळणार असून, नव्या पिढीपर्यंत परिवर्तनवादी विचार पोहोचविण्यास निश्चितच मदत होणार आहे.
बैठकीच्या अध्यक्षस्थानी लाल सेनेचे नेते कॉम्रेड गजानन उर्फ पिंटू घोडके होते. यावेळी कॉम्रेड गणपत भिसे, अविनाश मोरे, एल. डी. कदम, अजित शिंदे, अशोक उबाळे,किशोर कांबळे, कोंडीबा जाधव, हेमंत साळवे, अमन कदम यांच्यासह लाल सेनेचे पदाधिकारी व कार्यकर्ते उपस्थित होते.
आगामी संमेलनाच्या आयोजनाची रूपरेषा, विविध कार्यक्रमांचे नियोजन आणि संमेलन यशस्वी करण्यासाठी आवश्यक तयारीबाबत बैठकीत सविस्तर चर्चा करण्यात आली.
