शहादा,दि.७(का.प्र.)
शहादा शहरातील खराब रस्ते व धोकादायक खड्ड्यांच्या प्रश्नावर ‘व्हिजन शहादा’च्या वतीने दि. २ ऑक्टोबर रोजी गांधी जयंतीनिमित्त आयोजित “खड्डेमुक्त शहादा आंदोलन” अंतर्गत नागरिकांनी केलेल्या स्वाक्षरी मोहिमेचे निवेदन आज जिल्हाधिकारी कार्यालय नंदुरबार येथे सादर करण्यात आले.
व्हिजन शहादाचे संस्थापक विशाल निकूम यांच्या नेतृत्वाखालील टीमने जिल्हाधिकारी डॉ.मिताली सेठी यांची भेट घेऊन हजारो नागरिकांच्या स्वाक्षऱ्या असलेले निवेदन सुपूर्द केले. शहरात तातडीने रस्त्यांची दुरुस्ती करून नागरिकांना सुरक्षित आणि दर्जेदार रस्ते उपलब्ध करून देण्याची आग्रही मागणी यावेळी करण्यात आली. रस्त्यांच्या दुरुस्तीबाबत यापूर्वी अनेकदा निवेदने, तक्रारी आणि पाठपुरावा करूनही प्रशासनाकडून अपेक्षित गतीने काम होत नसल्याने, लवकरात लवकर दुरुस्ती न झाल्यास नवरात्रोत्सवानंतर तीव्र व अनिश्चितकालीन आंदोलन छेडण्यात येईल, अशी पूर्वसूचना देणारे पत्रही प्रशासनाला देण्यात आले आहे.
यादरम्यान टीमने स्कूल ठिक करो अभियानाच्या पाठपुराव्यासाठी जिल्हा सहआयुक्तांची भेट घेऊन सविस्तर चर्चा केली. ऑगस्ट व सप्टेंबर महिन्यात शहादा नगरपरिषदेच्या १४ शाळांमध्ये राबविण्यात आलेल्या या अभियानामध्ये शाळांच्या इमारती, स्वच्छतागृहे, पिण्याचे पाणी, सुरक्षा आणि इतर मूलभूत सुविधांची पाहणी करण्यात आली होती. या अहवालावर प्रशासनाकडून तातडीने योग्य ती कार्यवाही व्हावी, अशी मागणी करण्यात आली.याशिवाय शहादा शहराच्या एकूण विकासकामांवरही यावेळी सविस्तर चर्चा झाली. शहरातील रस्ते, स्वच्छता, शैक्षणिक सुविधा व इतर मूलभूत प्रश्नांवर प्रशासनाने समन्वयाने व कालबद्ध पद्धतीने मार्ग काढत ठोस कार्यवाही करावी, अशी भूमिका टीमने मांडली. नागरिकांच्या मूलभूत प्रश्नांवर आमचा हा शांततापूर्ण, लोकशाहीवादी आणि सातत्यपूर्ण पाठपुरावा यापुढेही असाच सुरू राहील, असा विश्वास यावेळी व्यक्त करण्यात आला.
