उंदरगाव, ता. करमाळा : कै. श्रीमती धनाबाई माणिक कोलते यांच्या प्रथम स्मृतिदिनानिमित्त सोमवार, दि. १२ ऑक्टोबर २०२६ रोजी सकाळी १० वाजता उंदरगाव येथे प्रथम स्मृती ज्ञानोत्सवाचे आयोजन करण्यात आले आहे.
या कार्यक्रमाच्या अध्यक्षस्थानी जि. प. सदस्या सौ. सविताताई राजेभोसले राहणार असून, प्रमुख मार्गदर्शक व व्याख्याते म्हणून प्रा. युवराज पाटील उपस्थित राहणार आहेत. त्यांच्या व्याख्यानाचा विषय ‘चला, कुटुंब जपूया!’ असा आहे.
ज्ञानोत्सवानिमित्त विविध उपक्रमांचे आयोजन करण्यात आले असून, आदर्श लोकप्रतिनिधी सन्मान, आदर्श शिक्षक दाम्पत्य सन्मान तसेच आदर्श युवा उद्योजक सन्मान देण्यात येणार आहेत. तसेच जिल्हा परिषद प्राथमिक शाळेच्या वाचनालयासाठी १५० पेक्षा अधिक पुस्तकांचा ग्रंथसंच भेट देण्यात येणार आहे. उपस्थितांसाठी ‘शिवाजी कोण होता?’ या पुस्तकाचेही वितरण करण्यात येणार आहे.
कै. धनाबाई माणिक कोलते यांच्या स्मृतीला उजाळा देतानाच विद्यार्थ्यांमध्ये वाचनाची आवड निर्माण व्हावी, कुटुंबव्यवस्था बळकट व्हावी आणि समाजातील कर्तृत्ववान व्यक्तींचा गौरव व्हावा, या उद्देशाने या ज्ञानोत्सवाचे आयोजन करण्यात आले आहे.
कार्यक्रमास नागरिकांनी मोठ्या संख्येने उपस्थित राहावे, असे आवाहन माजी सरपंच मा. आप्पासाहेब माणिक कोलते यांनी केले आहे.
