दोन वितरक गजाआड
कल्याण प्रतिनिधी – उच्च रक्तदाबावर वापरल्या जाणाऱ्या ‘टेल्मा एएम’ या नामांकित औषधाच्या बनावट गोळ्यांची विक्री सुरू असल्याचा धक्कादायक प्रकार उघडकीस आला आहे. डोंबिवली आणि मुंबई येथील दोन औषध वितरकांना मानपाडा पोलिसांनी अटक केली आहे.
डोंबिवलीतील ‘श्री राम फार्मा’चा मालक पंकज उपाध्याय आणि मुंबईतील वितरक विवेक अजयकुमार राय (वय ३५, रा. कांदिवली) यांना अटक करण्यात आली. आरोपींकडून नामांकित कंपनीच्या लेबल्ससह बनावट औषधांचा मोठा साठा जप्त करण्यात आला आहे.
एफडीएचा धक्कादायक खुलासा
अन्न व औषध प्रशासन विभाग (एफडीए) यांच्या तपासात या बनावट गोळ्या शरीरात उशिरा विरघळत असल्याचे निष्पन्न झाले. त्यामुळे उच्च रक्तदाबाच्या रुग्णांना हृदयविकाराचा झटका किंवा स्ट्रोकचा गंभीर धोका संभवतो. या प्रकरणात बिहार कनेक्शनही समोर आल्याचे सूत्रांनी सांगितले.
आठ लाखांहून अधिक किमतीचा साठा जप्त
२० जानेवारी रोजी एफडीएने छापा टाकून पंकज उपाध्याय याच्याकडून सुमारे ८ लाख ९४ हजार ४०० रुपये किंमतीच्या ‘टेल्मा एएम’ गोळ्यांच्या एकूण २७९५ स्ट्रीप जप्त केल्या. त्यानंतर मानपाडा पोलीस ठाण्यात गुन्हा दाखल करण्यात आला.
तपासात हे बनावट औषध विवेक राय याच्याकडून पुरवले जात असल्याचे स्पष्ट झाले. दोघांनी संगनमताने हा गुन्हा केल्याचा आरोप असून १६ फेब्रुवारी रोजी विवेक राय यालाही अटक करण्यात आली.
तपास सुरू
या प्रकरणाचा पुढील तपास पोलीस उपायुक्त अतुल झेंडे, सहाय्यक पोलीस आयुक्त सुहास हेमाडे, वरिष्ठ पोलीस निरीक्षक संदीपान शिंदे यांच्या मार्गदर्शनाखाली सहाय्यक पोलिस निरीक्षक महेश राळेभात व गुन्हे प्रकटीकरण पथक करीत आहे.
उच्च रक्तदाबाच्या रुग्णांच्या जीवाशी खेळ करणाऱ्या या बनावट औषध रॅकेटमुळे आरोग्य यंत्रणेत खळबळ उडाली असून नागरिकांनी औषधे खरेदी करताना दक्षता घेण्याचे आवाहन करण्यात आले आहे.
