परभणी प्रतिनिधी:- रमेश मुलगीर. सवलतधारकांसाठी NCMC स्मार्ट कार्ड अनिवार्य; डिजिटल व्यवहारास मिळाली चालना
महाराष्ट्र राज्य परिवहन महामंडळ यांच्या नवीन एन.सी.एम.सी. (NCMC) स्मार्ट कार्ड प्रणालीचा पाथरी बसस्थानकात आज दि. २२ फेब्रुवारी रोजी शुभारंभ करण्यात आला.सवलतधारक प्रवाशांसाठी NCMC स्मार्ट कार्ड अनिवार्य करण्यात आले असून, प्रवासी सोयीसाठी तसेच वाहतूक व्यवस्थेत डिजिटल व्यवहाराला चालना देण्याच्या उद्देशाने ही योजना राबविण्यात येत आहे. सुट्ट्या पैशांच्या समस्येतून मार्ग काढणे आणि व्यवहार अधिक पारदर्शक व सुरक्षित करण्यासाठी हे स्मार्ट कार्ड उपयुक्त ठरणार आहे. सर्व सवलतधारक प्रवाशांनी NCMC स्मार्ट कार्डचा वापर करणे आवश्यक असल्याचे महामंडळाच्या धोरणानुसार स्पष्ट करण्यात आले आहे.
पाथरी येथील बसस्थानकात या प्रणालीचा शुभारंभ पाथरी आगारातील अधिकारी श्री. गजानन येडले यांच्या हस्ते करण्यात आला. यावेळी श्री. धोंडीराम जाधव, दिगंबर यादव, शिरीष दडके, प्रतिनिधी अरुण रसाळ तसेच पत्रकार सुनील तळेकर उपस्थित होते.
शुभारंभाच्या पहिल्याच दिवशी प्रवाशांनी उत्स्फूर्त प्रतिसाद देत सहकार्य केले. जेष्ठ नागरिक, महिला, अमृत जेष्ठ नागरिक, दिव्यांग तसेच विद्यार्थ्यांसाठी हे स्मार्ट कार्ड अनिवार्य करण्यात आले असून, वेगवान व सुरक्षित पेमेंट प्रणालीमुळे प्रवास अधिक सुलभ, सुरक्षित आणि पारदर्शक होईल, अशी माहिती स्थानक प्रमुख श्री. गजानन येडले यांनी दिली.
या प्रसंगी पाथरी आगारातील वाहक, चालक, लेखा विभागातील कर्मचारी, वाहतूक नियंत्रक, सुरक्षा अधिकारी तसेच नागरिक मोठ्या संख्येने उपस्थित होते.
